‘One Tree, One Pledge : वन विभाग कार्यालय, पातूर यांच्या वतीने वन महोत्सव उत्साहात साजरा करण्यात आला. पर्यावरण संवर्धनाचा संदेश देण्यासाठी वृक्षारोपण करण्यात आले, तर क्रीडा संस्कृतीला प्रोत्साहन देण्यासाठी एकदिवसीय क्रिकेट स्पर्धेचे आयोजन करण्यात आले. पर्यावरण संरक्षण आणि क्रीडाभावना यांचा सुंदर संगम या उपक्रमातून अनुभवायला मिळाला.
हरित संदेशासह क्रीडेला चालना; पातूर वन विभागाचा अभिनव उपक्रम
निशांत गवई
पातूर : वन विभाग कार्यालय, पातूर यांच्या वतीने वन महोत्सव उत्साहात साजरा करण्यात आला. पर्यावरण संवर्धनाचा संदेश देण्यासाठी वृक्षारोपण करण्यात आले, तर क्रीडा संस्कृतीला प्रोत्साहन देण्यासाठी एकदिवसीय क्रिकेट स्पर्धेचे आयोजन करण्यात आले. पर्यावरण संरक्षण आणि क्रीडाभावना यांचा सुंदर संगम या उपक्रमातून अनुभवायला मिळाला.
कार्यक्रमाच्या प्रारंभी मान्यवरांच्या हस्ते वृक्षारोपण करण्यात आले. उपस्थितांनी वृक्ष लागवड करून त्यांचे संगोपन व संवर्धन करण्याचा संकल्प केला. पर्यावरणाचा समतोल राखण्यासाठी प्रत्येकाने वृक्ष लागवड करून त्यांचे जतन करणे ही काळाची गरज असल्याचा संदेश यावेळी देण्यात आला.
वन महोत्सवानिमित्त आयोजित करण्यात आलेल्या एकदिवसीय क्रिकेट स्पर्धेत विविध संघांनी उत्साहाने सहभाग घेतला. खेळाडूंनी शिस्तबद्ध आणि क्रीडाभावनेने खेळाचे उत्कृष्ट प्रदर्शन करत स्पर्धा रंगतदार केली. स्पर्धेच्या माध्यमातून युवकांमध्ये क्रीडाप्रेम, संघभावना आणि निरोगी जीवनशैलीचा संदेशही देण्यात आला.
या कार्यक्रमाला वनपरिक्षेत्र अधिकारी पवन जाधव, अविनाश घुगे, विष्णू सोनुणे, पत्रकार नातीक शेख, अरुण राठोड, आदित्य देशमुख, शंकर सावळे, ओम सावके, दयाल, गोलू जंजाळ यांच्यासह वन विभागाचे अधिकारी, कर्मचारी आणि क्रिकेटपटू मोठ्या संख्येने उपस्थित होते.
कार्यक्रमाच्या समारोपावेळी उपस्थितांनी वन विभागाच्या या उपक्रमाचे कौतुक करत पर्यावरण संरक्षण आणि क्रीडा संस्कृतीला चालना देणारे असे उपक्रम नियमितपणे आयोजित व्हावेत, अशी अपेक्षा व्यक्त केली. वन महोत्सवाच्या निमित्ताने हरित पर्यावरणाचा संदेश समाजापर्यंत पोहोचविण्याचा प्रयत्न यशस्वी ठरल्याची भावना उपस्थितांनी व्यक्त केली.
