Assault in Nimgaon Guru: तालुक्यातील निमगाव गुरू येथे कौटुंबिक वादातून एका शेतकऱ्याला काठीने मारहाण करून जखमी केल्याची घटना समोर आली आहे. या प्रकरणी देऊळगाव राजा पोलिसांनी दोन जणांविरुद्ध विविध कलमान्वये गुन्हा दाखल केला असून पुढील तपास सुरू आहे.
सासरवाडीबाबत उलटसुलट बोलण्याच्या वादातून हल्ला; देऊळगाव राजा पोलिसांत गुन्हा
गजानन तिडके
देऊळगाव राजा : तालुक्यातील निमगाव गुरू येथे कौटुंबिक वादातून एका शेतकऱ्याला काठीने मारहाण करून जखमी केल्याची घटना समोर आली आहे. या प्रकरणी देऊळगाव राजा पोलिसांनी दोन जणांविरुद्ध विविध कलमान्वये गुन्हा दाखल केला असून पुढील तपास सुरू आहे.
पोलिसांकडून मिळालेल्या माहितीनुसार, सारंगधर विठोबा धारे (वय 38, व्यवसाय शेती, रा. निमगाव गुरू, ता. देऊळगाव राजा) यांनी याबाबत फिर्याद दिली आहे. त्यानुसार, रामेश्वर विठोबा धारे आणि लक्ष्मी विठोबा धारे, दोघेही रा. निमगाव गुरू, यांच्याविरुद्ध गुन्हा दाखल करण्यात आला आहे. ही घटना 25 जून 2026 रोजी सायंकाळी साडेपाच वाजताच्या सुमारास निमगाव गुरू शिवारात घडली. याबाबतची फिर्याद 2 जुलै 2026 रोजी देऊळगाव राजा पोलीस ठाण्यात नोंदविण्यात आली.
फिर्यादी व आरोपी हे एकमेकांचे नातेवाईक असल्याचे पोलिसांनी सांगितले. फिर्यादीनुसार, आरोपी क्रमांक 1 हा फिर्यादीच्या सासरवाडीशी मोबाईलद्वारे संपर्क साधून त्यांच्याविषयी उलटसुलट माहिती देत असल्याचा संशय होता. याबाबत फिर्यादीने आरोपीला जाब विचारला असता दोघांमध्ये वाद झाला. यावेळी आरोपी रामेश्वर धारे याने हातातील काठीने फिर्यादीच्या डोक्यावर व डाव्या हातावर मारहाण करून त्यांना जखमी केल्याचा आरोप आहे.
तसेच आरोपी लक्ष्मी धारे हिनेही फिर्यादीला चापटाबुक्क्यांनी मारहाण केल्याचे फिर्यादीत नमूद करण्यात आले आहे. याचवेळी दोघांनी शिवीगाळ करत पुन्हा सासरवाडीच्या प्रकरणावरून आमच्यावर खोटा आरोप केल्यास गंभीर परिणाम भोगावे लागतील, अशी धमकी दिल्याचाही आरोप फिर्यादीने केला आहे.
मारहाणीत जखमी झाल्यानंतर फिर्यादी यांनी सामान्य रुग्णालय, जालना येथे उपचार घेतले. उपचारानंतर ते देऊळगाव राजा पोलीस ठाण्यात हजर झाले. त्यानंतर पोलिसांनी कायमी अप क्रमांक 302/2026 अन्वये कलम 118(1), 352, 351(2), 351(3), 3(5) बीएनएस अंतर्गत गुन्हा दाखल केला आहे.
या प्रकरणाची नोंद पोलीस हेडकॉन्स्टेबल विनोद गवई यांनी केली असून, पुढील तपास पोलीस हेडकॉन्स्टेबल शरद साळवे करीत आहेत. कौटुंबिक वादातून घडलेल्या या घटनेमुळे परिसरात चर्चा सुरू असून पोलिसांकडून प्रकरणाचा अधिक तपास सुरू आहे.
