Maulana Ismail Ishaati :परिसरात अद्यापही समाधानकारक पाऊस न झाल्याने शेतकरी आणि सर्वसामान्य नागरिक पावसाच्या प्रतीक्षेत आहेत. अशा परिस्थितीत काझीपुरा येथील बलदार हाफिज मशिदीचे इमाम व खतीब तसेच शेख-उल-हदीस मौलाना इस्माईल ईशाआती यांनी समाजाला आत्मपरीक्षण, तौबा आणि अल्लाहकडे प्रामाणिकपणे रुजू होण्याचा महत्त्वपूर्ण संदेश दिला.
“अल्लाहकडे रुजू व्हा, रहमतचे दरवाजे उघडतील”; मौलाना ईशाआती यांचा समाजाला संदेश
ज़ाकीर अहमद शेख
बाळापूर : परिसरात अद्यापही समाधानकारक पाऊस न झाल्याने शेतकरी आणि सर्वसामान्य नागरिक पावसाच्या प्रतीक्षेत आहेत. अशा परिस्थितीत काझीपुरा येथील बलदार हाफिज मशिदीचे इमाम व खतीब तसेच शेख-उल-हदीस मौलाना इस्माईल ईशाआती यांनी समाजाला आत्मपरीक्षण, तौबा आणि अल्लाहकडे प्रामाणिकपणे रुजू होण्याचा महत्त्वपूर्ण संदेश दिला.
शुक्रवारी (दि. १२ जून) झालेल्या मार्गदर्शनात मौलाना म्हणाले की, इस्लामी शिकवणीनुसार पाऊस ही अल्लाहची एक मोठी रहमत आणि नेमत आहे. जेव्हा समाजात खोटेपणा, अन्याय, फसवणूक, हक्कांचे उल्लंघन आणि अल्लाहच्या आदेशांकडे दुर्लक्ष वाढते, तेव्हा काही वेळा अल्लाहच्या रहमतींमध्ये अडथळे निर्माण होतात. त्यामुळे प्रत्येकाने स्वतःच्या कृतींचे आत्मपरीक्षण करून अल्लाहकडे माफी मागण्याची गरज असल्याचे त्यांनी स्पष्ट केले.
कुरआन आणि हदीसच्या प्रकाशात मार्गदर्शन करताना त्यांनी सांगितले की, पावसाच्या कमतरतेवर उपाय शोधताना केवळ भौतिक किंवा वैज्ञानिक प्रयत्नांवर अवलंबून न राहता आध्यात्मिक सुधारणेलाही महत्त्व द्यावे. तौबा, इस्तिगफार, नमाजची नियमितता, सदका-खैरात, गरजूंना मदत आणि सत्कर्मांची वाढ याकडे विशेष लक्ष देण्याचे आवाहन त्यांनी केले.
यावेळी मौलाना इस्माईल ईशाआती यांनी सलातुल इस्तिस्का (पावसासाठीची विशेष नमाज), सामूहिक इस्तिगफार आणि दुआ यांचे महत्त्वही अधोरेखित केले. “जेव्हा बंदे नम्रतेने, पश्चात्तापाने आणि प्रामाणिक भावनेने आपल्या पालनकर्त्यासमोर झुकतात, तेव्हा अल्लाह आपल्या रहमती आणि बरकतींचे दरवाजे उघडतो,” असे ते म्हणाले.
त्यांनी नागरिकांना वैयक्तिक आणि सामाजिक जीवनात सकारात्मक बदल घडवून आणण्याचे, परस्पर बंधुभाव वाढविण्याचे आणि पाऊस, अमन, बरकत तसेच समाजाच्या समृद्धीसाठी दुआ करण्याचे आवाहन केले.
मौलानांचा हा संदेश धार्मिक आणि सामाजिक वर्तुळात चर्चेचा विषय ठरत असून, पावसाच्या प्रतीक्षेत असलेल्या समाजाला आत्मपरीक्षण आणि सदाचाराचा मार्ग स्वीकारण्याची प्रेरणा देणारा ठरत आहे.
