Objections raised against : नगर परिषद निवडणुकीनंतर बाळापूरच्या राजकीय वर्तुळात चर्चेचा विषय ठरलेला एक महत्त्वपूर्ण घटनाक्रम समोर आला आहे. नागरिकांचा मागास प्रवर्ग (महिला) आरक्षित प्रभागातून निवडून आलेल्या एका नगरसेविका तसेच नागरिकांचा मागास प्रवर्ग (सर्वसाधारण) प्रभागातून निवडून आलेल्या एका नगरसेवकाच्या जात वैधता प्रमाणपत्रांबाबत आक्षेप नोंदविण्यात आल्याची माहिती समोर आली आहे.
नगर परिषद निवडणुकीनंतर नवा वाद; जात वैधता प्रमाणपत्रांबाबत तक्रारी दाखल
बाळापूर : नगर परिषद निवडणुकीनंतर बाळापूरच्या राजकीय वर्तुळात चर्चेचा विषय ठरलेला एक महत्त्वपूर्ण घटनाक्रम समोर आला आहे. नागरिकांचा मागास प्रवर्ग (महिला) आरक्षित प्रभागातून निवडून आलेल्या एका नगरसेविका तसेच नागरिकांचा मागास प्रवर्ग (सर्वसाधारण) प्रभागातून निवडून आलेल्या एका नगरसेवकाच्या जात वैधता प्रमाणपत्रांबाबत आक्षेप नोंदविण्यात आल्याची माहिती समोर आली आहे.
मिळालेल्या माहितीनुसार, संबंधित प्रभागांमधून निवडणूक लढविणाऱ्या काही प्रतिस्पर्धी उमेदवारांनी नव-निर्वाचित सदस्यांच्या जात वैधता प्रमाणपत्रांबाबत प्रश्न उपस्थित करत संबंधित जात पडताळणी (छाननी) समितीकडे औपचारिक तक्रारी दाखल केल्या आहेत. तक्रारदारांनी सादर करण्यात आलेल्या कागदपत्रांची तसेच जात वैधता प्रमाणपत्र प्राप्त करण्यासाठी अवलंबण्यात आलेल्या प्रक्रियेची सखोल आणि निष्पक्ष चौकशी करण्याची मागणी केली आहे.
संबंधित प्रभागांपैकी एक प्रभाग नागरिकांचा मागास प्रवर्ग (महिला) या आरक्षित गटासाठी राखीव होता, तर दुसरा प्रभाग नागरिकांचा मागास प्रवर्ग (सर्वसाधारण) या प्रवर्गासाठी राखीव होता. त्यामुळे निवडून आलेल्या सदस्यांच्या पात्रतेशी संबंधित या बाबींना विशेष महत्त्व प्राप्त झाले असून, आक्षेपांमुळे राजकीय चर्चांना उधाण आले आहे.
राजकीय निरीक्षकांच्या मते, जात पडताळणी समितीने या प्रकरणाची सविस्तर सुनावणी आणि चौकशी हाती घेतल्यास आगामी काळात हा विषय स्थानिक राजकारणातील महत्त्वाचा मुद्दा ठरू शकतो. निवडणुकीनंतर अशा प्रकारच्या तक्रारी समोर आल्याने त्याचे राजकीय परिणामही दिसून येण्याची शक्यता व्यक्त केली जात आहे.
दुसरीकडे, संबंधित सदस्यांच्या समर्थकांनी सर्व आरोप फेटाळून लावत हे आक्षेप राजकीय हेतूने प्रेरित असल्याचा दावा केला आहे. त्यांच्या म्हणण्यानुसार, संबंधित जात वैधता प्रमाणपत्रे सर्व वैधानिक प्रक्रिया आणि आवश्यक कागदपत्रांच्या आधारे प्राप्त करण्यात आली आहेत. निवडणुकीतील पराभवानंतर विरोधकांकडून अनावश्यक वाद निर्माण करण्याचा प्रयत्न केला जात असल्याचे त्यांनी म्हटले आहे.
चौकशीनंतर वस्तुस्थिती स्पष्ट होईल आणि सर्व बाबी समोर येतील, असा विश्वासही समर्थकांनी व्यक्त केला आहे.
सध्या नागरिक, मतदार तसेच राजकीय कार्यकर्त्यांचे लक्ष जात पडताळणी समितीच्या पुढील कार्यवाहीकडे लागले आहे. समितीच्या चौकशी अहवालानंतर आणि अंतिम निर्णयानंतरच तक्रारींमधील तथ्यस्थिती स्पष्ट होणार आहे.
दरम्यान, शहरातील कागजीपुरा, खतीब कॉलनी, कासारखेड तसेच विविध चौक, बाजारपेठा आणि चहाच्या टपऱ्यांवर या विषयाची जोरदार चर्चा रंगताना दिसत आहे. नगर परिषद निवडणुकीनंतर उद्भवलेला हा विषय सध्या बाळापूरच्या स्थानिक राजकारणातील चर्चेचा केंद्रबिंदू ठरला आहे.
