Private Bus Accident; समृद्धी महामार्गावर मेहकरजवळील फर्जापूर टोल नाक्यावर खाजगी प्रवासी बसचा भीषण अपघात झाल्याची घटना समोर आली आहे. बस चालक आणि वाहक मोबाईलवर रील बनवण्यात गुंतले असल्यामुळे हा अपघात घडल्याची माहिती प्रत्यक्षदर्शींनी दिली आहे.
चालक वाहक काढत होते रिल्स, नियंत्रण सुटल्याने घडला अपघात
डोणगाव : समृद्धी महामार्गावर मेहकरजवळील फर्जापूर टोल नाक्यावर खाजगी प्रवासी बसचा भीषण अपघात झाल्याची घटना समोर आली आहे. बस चालक आणि वाहक मोबाईलवर रील बनवण्यात गुंतले असल्यामुळे हा अपघात घडल्याची माहिती प्रत्यक्षदर्शींनी दिली आहे.
या अपघातात दीड वर्षीय चिमुकल्याचा दुर्दैवी मृत्यू झाला असून २५ प्रवासी जखमी झाले आहेत. जखमींपैकी सहा जणांची प्रकृती गंभीर असल्याची माहिती मिळत आहे. सर्व जखमींवर सध्या रुग्णालयात उपचार सुरू आहेत.
दरम्यान, अपघातग्रस्त बस दुसऱ्या एका कारवर आदळल्याने त्या कारचेही मोठे नुकसान झाले आहे. अपघातानंतर जखमींना तात्काळ मेहकर येथील ग्रामीण रुग्णालयात हलवण्यात आले. मात्र, तेथे सुमारे एक तास डॉक्टर उपस्थित नसल्याने जखमींच्या नातेवाईकांनी आक्रोश व्यक्त केला.
मिळालेल्या माहितीनुसार, मुंबईहून पुसदकडे जाणारी ही खाजगी बस सकाळी सहाच्या सुमारास अपघातग्रस्त झाली. चालक आणि वाहक मोबाईलवर रील बनवण्यात व्यस्त असल्याने अपघात झाल्याचा आरोप बसमधील प्रवाशांनी केला आहे. सध्या गंभीर जखमींवर खाजगी रुग्णालयात उपचार सुरू आहेत.
