Water Kiosk :उन्हाळ्याची चाहूल लागताच वाढत्या तापमानामुळे प्रवासी आणि नागरिकांना पिण्याच्या पाण्याची मोठी गरज भासू लागते. ही गरज लक्षात घेऊन डोणगाव येथे दरवर्षीप्रमाणे यंदाही महेश परिवाराच्या वतीने सामाजिक बांधिलकी जपत तहानलेल्या प्रवाशांच्या सेवेसाठी पाणपोई सुरू करण्यात आली आहे.
डोणगाव : उन्हाळ्याची चाहूल लागताच वाढत्या तापमानामुळे प्रवासी आणि नागरिकांना पिण्याच्या पाण्याची मोठी गरज भासू लागते. ही गरज लक्षात घेऊन डोणगाव येथे दरवर्षीप्रमाणे यंदाही महेश परिवाराच्या वतीने सामाजिक बांधिलकी जपत तहानलेल्या प्रवाशांच्या सेवेसाठी पाणपोई सुरू करण्यात आली आहे.
दि. १६ मार्च रोजी स्थानिक महेश अर्बन बँकेसमोर, बसस्थानक परिसरात येणाऱ्या-जाणाऱ्या प्रवासी तसेच नागरिकांसाठी आरओ पाण्याची पाणपोई सुरू करण्यात आली. महेश अर्बन परिवाराचे डॉ. महेश लोहीया आणि महेश अर्बन बँकेचे अध्यक्ष गोपाल मोदाणी यांच्या प्रेरणेने हा सामाजिक उपक्रम दरवर्षी राबवला जातो. या उपक्रमामुळे उन्हाच्या कडाक्यातही अनेक प्रवासी व नागरिकांची तहान भागवली जात आहे.
महेश अर्बन बँकेची शाखा सुरू झाल्यापासून डोणगाव शाखेचे व्यवस्थापक गजानन डोंगरदिवे व बँकेचे कर्मचारी सातत्याने या उपक्रमात पुढाकार घेत आहेत. बसस्थानक परिसरात लावण्यात आलेली ही पाणपोई प्रवासी, नागरिक आणि परिसरातील लोकांसाठी दिलासा ठरत आहे.
या पाणपोईचे उद्घाटन आरेगाव येथील सामाजिक कार्यकर्ते सुभाष टाले, डोणगावचे दीपक पळसकर, अभिजीत पळसकर, महेश अर्बनचे संचालक सुरेश फिसके, डोणगाव पत्रकार संघाचे अध्यक्ष सचिन गाभणे तसेच महेश अर्बन बँकेचे शाखा व्यवस्थापक गजानन डोंगरदिवे व बँक कर्मचाऱ्यांच्या हस्ते फित कापून करण्यात आले.
बँक स्थापनेपासून सुरू असलेली ही सेवा आजही अखंडपणे सुरू असून उन्हाळ्याच्या दिवसांत अनेकांची तहान भागवण्याचे कार्य ही पाणपोई करत आहे. समाजाप्रती असलेली बांधिलकी जपत महेश अर्बन परिवाराने राबवलेला हा उपक्रम इतरांसाठीही प्रेरणादायी ठरत आहे.
