Motala Nagar Panchayat : मोताळा नगर पंचायतीत आज झालेल्या विशेष सभेत विषय समित्यांची पुनर्रचना करत नव्या सभापतींची निवड करण्यात आली. उपजिल्हाधिकारी, बुलढाणा यांच्या आदेशानुसार व २० फेब्रुवारी २०२६ रोजी जारी करण्यात आलेल्या विशेष सभेच्या नोटिशीप्रमाणे ४ मार्च २०२६ रोजी ही सभा पार पडली. समिती सदस्य नामनिर्देशन आणि सभापती पदांच्या निवडणुकीची प्रक्रिया शांततेत पूर्ण झाली.
मोताळा : मोताळा नगर पंचायतीत आज झालेल्या विशेष सभेत विषय समित्यांची पुनर्रचना करत नव्या सभापतींची निवड करण्यात आली. उपजिल्हाधिकारी, बुलढाणा यांच्या आदेशानुसार व २० फेब्रुवारी २०२६ रोजी जारी करण्यात आलेल्या विशेष सभेच्या नोटिशीप्रमाणे ४ मार्च २०२६ रोजी ही सभा पार पडली. समिती सदस्य नामनिर्देशन आणि सभापती पदांच्या निवडणुकीची प्रक्रिया शांततेत पूर्ण झाली.
यामध्ये स्थायी समितीचे गठन करण्यात आले असून सभापतीपदी नगराध्यक्षा माधुरीताई देशमुख यांची निवड करण्यात आली. तसेच शिक्षण समितीच्या सभापती म्हणून उपाध्यक्ष शहनाज बी. शेख सलीम यांची नियुक्ती करण्यात आली.
सार्वजनिक बांधकाम व नियोजन समितीच्या सभापतीपदी सौ. सरिता विजय सुरडकर यांची निवड झाली. त्यांच्या निवडीसाठी शेख तस्लीम शेख सलीम यांनी सुचविले तर निना सिताराम इंगळे यांनी अनुमोदन दिले.
पाणीपुरवठा व आरोग्य समिती समितीच्या सभापतीपदी प्रमोद दादाराव देशमुख यांची निवड झाली. त्यांच्या नावाचा प्रस्ताव हसमत व्ही. जलील खान यांनी मांडला तर रविंद्र देवराव पाटील यांनी अनुमोदन दिले.
महिला व बालकल्याण समितीच्या सभापतीपदी अनिता कैलास झंवर यांची निवड करण्यात आली. त्यांच्या नावाचा प्रस्ताव खातून बी. शेख रशीद यांनी मांडला आणि सिंधुताई शंकर वानखेडे यांनी अनुमोदन दिले.
नगर पंचायतीतील या फेरबदलामुळे स्थानिक राजकारणात नव्या समीकरणांना चालना मिळाली आहे. विविध समित्यांवर नव्या नेतृत्वाला संधी देत प्रशासन आणि लोकप्रतिनिधींमध्ये समन्वय वाढवण्याचा प्रयत्न असल्याचे राजकीय वर्तुळात बोलले जात आहे. आगामी काळात विकासकामांना गती मिळणार का, याकडे नागरिकांचे लक्ष लागले आहे.
