Britain refuses to provide airbase : ब्रिटनने अमेरिकेला इराणवर संभाव्य हल्ल्यासाठी आपल्या लष्करी एअरबेसचा वापर करण्यास नकार दिल्याची माहिती समोर आली आहे. अमेरिकेला या तळांचा वापर करायचा होता; मात्र ब्रिटिश सरकारने त्यास मान्यता दिली नाही.
लंडन : ब्रिटनने अमेरिकेला इराणवर संभाव्य हल्ल्यासाठी आपल्या लष्करी एअरबेसचा वापर करण्यास नकार दिल्याची माहिती समोर आली आहे. अमेरिकेला या तळांचा वापर करायचा होता; मात्र ब्रिटिश सरकारने त्यास मान्यता दिली नाही.
‘डेली मेल’च्या वृत्तानुसार, या निर्णयामुळे अमेरिकेचे राष्ट्राध्यक्ष डोनाल्ड ट्रम्प नाराज आहेत. त्यांनी ब्रिटनचे पंतप्रधान कीर स्टार्मर यांच्या त्या करारावरील पाठिंबा मागे घेतल्याचे सांगितले जाते, ज्यामध्ये चागोस द्वीपसमूह मॉरिशसला हस्तांतरित करण्याचा प्रस्ताव आहे.
अमेरिका इराणविरोधात कारवाईची तयारी करत असून, त्यासाठी डिएगो गार्सिया आणि RAF फेअरफोर्ड एअरबेसचा वापर करण्याची योजना होती. डिएगो गार्सिया हा चागोस द्वीपसमूहातील सर्वात मोठा बेट असून १९७० च्या दशकापासून तो अमेरिका-ब्रिटनचा संयुक्त लष्करी तळ आहे.
जुन्या करारांनुसार, ब्रिटनच्या कोणत्याही लष्करी तळाचा वापर ब्रिटिश पंतप्रधानांच्या मंजुरीशिवाय होऊ शकत नाही. आंतरराष्ट्रीय कायद्यानुसारही एखाद्या देशाला कारवाई बेकायदेशीर असल्याची जाणीव असताना मदत केल्यास त्यालाही जबाबदार धरले जाऊ शकते.
ट्रम्प यांची टीका
ट्रम्प यांनी सोशल मीडिया प्लॅटफॉर्म ‘ट्रुथ सोशल’वर चागोस बेटांच्या संदर्भात ब्रिटनवर टीका केली. १०० वर्षांच्या लीजवर बेट सोडणे हा चुकीचा निर्णय असल्याचे त्यांनी म्हटले. इराणने करार न केल्यास हिंद महासागरातील डिएगो गार्सिया आणि फेअरफोर्ड एअरफिल्डचा वापर करावा लागू शकतो, असेही त्यांनी नमूद केले.
ब्रिटिश सरकारचे म्हणणे आहे की, मॉरिशसबरोबरचा करार राष्ट्रीय सुरक्षेच्या दृष्टीने आवश्यक आहे आणि त्यामुळे दीर्घ व खर्चिक कायदेशीर वाद टाळता येतील. या करारावर सुमारे ३५ अब्ज पाउंड खर्च अपेक्षित असल्याचे सांगितले जाते.
चागोस द्वीपसमूहावर ब्रिटनने १८१४ मध्ये ताबा मिळवला होता. १९६५ मध्ये त्याला मॉरिशसपासून वेगळे करून ‘ब्रिटिश हिंद महासागर क्षेत्र’ घोषित करण्यात आले. १९६८ मध्ये मॉरिशसला स्वातंत्र्य मिळाल्यानंतर, संरक्षणाची गरज संपल्यास हे बेट परत देण्याचे ठरले होते. त्यानंतर डिएगो गार्सिया येथे अमेरिका-ब्रिटनचा संयुक्त लष्करी तळ उभारण्यात आला.
देशभरातील घडामोडींविषयी बातम्या वाचण्यासाठी भारत या पेजला भेट द्या
