remove encroachments: येथील ग्रामपंचायतीच्या मालकीच्या सार्वजनिक मुतारीघर तसेच खरेदी-विक्री संघाच्या गोडाऊनकडे जाणाऱ्या सुमारे २० फूट रुंद रस्त्यावर करण्यात आलेले अतिक्रमण तात्काळ हटवावे, या मागणीसाठी सामाजिक कार्यकर्ते शेख हनिफ बागवान यांनी प्रजासत्ताक दिनी ग्रामपंचायत सचिवालयासमोर आमरण उपोषण सुरू केले होते.
फकीरा पठाण
मलकापूर पांग्रा : येथील ग्रामपंचायतीच्या मालकीच्या सार्वजनिक मुतारीघर तसेच खरेदी-विक्री संघाच्या गोडाऊनकडे जाणाऱ्या सुमारे २० फूट रुंद रस्त्यावर करण्यात आलेले अतिक्रमण तात्काळ हटवावे, या मागणीसाठी सामाजिक कार्यकर्ते शेख हनिफ बागवान यांनी प्रजासत्ताक दिनी ग्रामपंचायत सचिवालयासमोर आमरण उपोषण सुरू केले होते. या उपोषणाची दखल घेत, एका महिन्याच्या आत कायदेशीर प्रक्रिया पूर्ण करून आवश्यकतेनुसार पोलीस संरक्षणात अतिक्रमण हटविण्यात येईल, असे लेखी आश्वासन ग्रामपंचायत प्रशासनाने दिले. त्यानंतर उपोषणकर्त्यांना नींबू शरबत देऊन उपोषणाची औपचारिक सांगता करण्यात आली.बसस्थानक परिसरात असलेल्या सार्वजनिक मुतारीघर व गोडाऊनकडे जाणारा रस्ता अतिक्रमणामुळे बंद झाल्याने नागरिकांना मोठ्या प्रमाणात अडचणींचा सामना करावा लागत होता. हा रस्ता तात्काळ खुला करावा, यासाठी वारंवार तक्रारी करूनही कारवाई होत नसल्याने अखेर शेख हनिफ बागवान यांनी प्रजासत्ताक दिनी सकाळी ध्वजारोहणानंतर ग्रामसचिवालयासमोर आमरण उपोषणास सुरुवात केली होती.
या आंदोलनाची दखल घेत गटविकास अधिकारी अजित बांगर यांनी भ्रमणध्वनीवरून उपोषणकर्त्याशी चर्चा करून अतिक्रमण हटविण्याबाबत ठोस आश्वासन दिले. तसेच ग्रामपंचायत अधिकारी उद्धव गायकवाड यांनी तात्काळ कायदेशीर कारवाई करून एका महिन्याच्या आत रस्ता अतिक्रमणमुक्त करून नागरिकांसाठी खुला करण्यात येईल, असे लेखी पत्र उपोषणकर्त्यांना दिले.
यावेळी गुलशेर खासाब, माजी उपसरपंच भगवान साळवे, माजी ग्रामपंचायत सदस्य अजहरखा पठाण, भगवान गावंडे, ग्रामपंचायत सदस्य राजू साळवे, अर्जुन मगर, मुबारक पठाण, ग्रामपंचायत सदस्य नामदेव उगले, माजी सरपंच बंडू उगले, मन्नान कुरेशी, गोपी टाले, शरद आटोळे, अंबादास टाले, बीट जमादार निवृत्ती पोफळे, मंडळ अधिकारी प्रेमानंद वानखेडे, तलाठी प्रभाकर बाविस्कर, पत्रकार पवन मगर, डॉ. गंगाराम उबाळे, फकीरा पठाण यांच्यासह गावातील शेकडो नागरिक उपोषण मंडपात उपस्थित होते.
