contesting the election: कोणतीही निवडणूक असो, संबंधित उमेदवारांनी आश्वासने जाहीर करून भविष्यातील व्हिजन स्पष्ट करणे अपेक्षित असते. मात्र देऊळगाव राजा येथील सद्यस्थितीकडे पाहता सर्वच उमेदवारांकडून पोकळ आश्वासने यापलीकडे काहीच समोर आलेले नाही. कोणाचाही जाहीरनामा प्रसिद्ध न झाल्याने मतदारांमध्ये संभ्रम निर्माण झाला आहे.
प्रभागासह नगराध्यक्ष पदाच्या उमेदवारांचे जाहीरनामेच नाहीत…!
गजानन तिडके
देऊळगाव राजा : कोणतीही निवडणूक असो, संबंधित उमेदवारांनी आश्वासने जाहीर करून भविष्यातील व्हिजन स्पष्ट करणे अपेक्षित असते. मात्र देऊळगाव राजा येथील सद्यस्थितीकडे पाहता सर्वच उमेदवारांकडून पोकळ आश्वासने यापलीकडे काहीच समोर आलेले नाही. कोणाचाही जाहीरनामा प्रसिद्ध न झाल्याने मतदारांमध्ये संभ्रम निर्माण झाला आहे.
पश्चिम विदर्भ–मराठवाडा सीमेवरील देऊळगाव राजा शहर ऐतिहासिक वारसा जपत असून येथील नगरपरिषदेला विशेष महत्त्व आहे. शहराचा सर्वांगीण विकास नगरपालिका प्रशासनामार्फत केला जात असताना, मतदारसंघातील सत्ता बदलानंतर आमदार मनोज कायंदे प्रथमच निवडणुकीला सामोरे जात आहेत. त्यामुळे प्रस्थापित नेत्यांची गोची झाल्याचे चित्र आहे. जनतेसमोर जायचे तर काय घेऊन जायचे? हा प्रश्न त्यांना सतावत आहे. गेल्या तीन दशकांपासून शहरवासीयांसाठी काही ठोस काम करू न शकल्याची जाणीव असूनही ‘आता पूर्ण विकास करू’ असे दावे केले जात आहेत. मात्र यावर मतदार विश्वास ठेवतील का, हे येत्या काळात स्पष्ट होणार आहे.
अध्यक्षपदाची तिरंगी लढत — पण शेवटच्या दोन दिवसांत काय होईल?
नगरपरिषद क्षेत्रात तीन प्रमुख आघाड्यांमध्ये लढत आहे. राष्ट्रवादी काँग्रेस (अजित पवार गट)–भाजपा–मित्रपक्ष ही पहिली आघाडी, राष्ट्रवादी काँग्रेस (शरद पवार गट)–शिवसेना (शिंदे गट) ही दुसरी, तर शिवसेना (उबाठा) आणि इतर मित्रपक्ष अशी तिसरी आघाडी आहे. वेळेवर अनेक प्रभागातील उमेदवारांनी पक्षांतर केल्यामुळे, अनेक वर्षे एखाद्या पक्षाशी निष्ठा ठेवणाऱ्यांच्या या बदलांकडे मतदार बारकाईने पाहत आहेत. “पक्ष का बदलला?” असा सरळ सवाल मतदार त्यांना करत आहेत. उमेदवार मात्र ‘प्रभागाचा विकास गरजेचा’ असे सांगत वेळ मारून नेत असल्याचे दिसते. लोकांचा आशीर्वाद प्रत्यक्ष मतदानात किती मिळतो, हे काही दिवसांत स्पष्ट होईल.
अजित पवारांचा प्रचारातील हल्लाबोल – मतदारांची मने जिंकली
विधानसभा निवडणूक प्रचारादरम्यान माझे येणे झाले नाही, तरी मी पाठवलेल्या व्हिडिओ संदेशावर मतदारांनी विश्वास ठेवून युवा नेतृत्वाला आमदार बनवले, असे अजित पवार यांनी सभेत सांगितले. मतदारसंघाच्या विकासासाठी आमदारांचे प्रयत्न दिसत असल्याचेही त्यांनी नमूद केले. मात्र पूर्वीच्या नेत्यांनी आपल्या धोरणामुळे दुसरबीड येथील सहकारी साखर कारखाना बंद होऊ दिल्याचा आरोप त्यांनी केला. तसेच खडकपूर्णा धरण तुडुंब भरले असतानाही शहराला पाणीपुरवठा न होणे, ऐतिहासिक देऊळगाव राजाचा बारामतीप्रमाणे विकास न होणे यावरही त्यांनी टीका केली. माजी लोकप्रतिनिधींनी निधी स्वतःसाठी वापरल्याचा आरोप करत “जनतेने तुम्हाला नाकारले आहे, आता अभद्र युती करून जनतेला फसवू शकत नाही,” असे त्यांनी स्पष्ट केले.
उपमुख्यमंत्री अजित पवार यांच्या टीकेनंतर आणि राजकीय हालचालीनंतर सध्या निवडणुकीचे चित्र धूसर असून अनुभवी मतदार बघ्याची भूमिका घेत आहेत. नगराध्यक्ष आणि प्रभागनिहाय लढतींचे स्पष्ट चित्र न दिसल्याने, पुढील दोन दिवसांत निवडणूक अधिक रंगतदार होण्याची शक्यता आहे.
