Dhamma Chakra Pravartana :धम्मचक्र परिवर्तनाच्या मिरवणुकीत माणुसकीचा जयघोष! अल-वाफी ट्रस्टचा बंधुभावाचा उपक्रम

Dhamma Chakra Pravartana : धर्म वेगवेगळे, श्रद्धा वेगवेगळ्या; मात्र माणुसकीचा धर्म एकच! या विचाराची प्रचिती बाळापूर शहरात विजयादशमीनिमित्त आयोजित धम्मचक्र परिवर्तनाच्या भव्य मिरवणुकीत आली. बौद्ध मंदिराजवळून निघालेल्या या मिरवणुकीत बौद्ध अनुयायांनी उत्साहाने सहभाग घेतला. शहरातील प्रमुख मार्गांवरून मार्गक्रमण करणाऱ्या या मिरवणुकीत सामाजिक एकता, शांतता आणि बंधुभावाचे दर्शन घडले.

   धर्म वेगळे, माणुसकी एकच! बाळापुरात खिचडी, पाणी अन् चहाच्या सेवेतून सर्वधर्मीय ऐक्याचा संदेश

झाकिर अहमद शेख

बाळापूर : धर्म वेगवेगळे, श्रद्धा वेगवेगळ्या; मात्र माणुसकीचा धर्म एकच! या विचाराची प्रचिती बाळापूर शहरात विजयादशमीनिमित्त आयोजित धम्मचक्र परिवर्तनाच्या भव्य मिरवणुकीत आली. बौद्ध मंदिराजवळून निघालेल्या या मिरवणुकीत बौद्ध अनुयायांनी उत्साहाने सहभाग घेतला. शहरातील प्रमुख मार्गांवरून मार्गक्रमण करणाऱ्या या मिरवणुकीत सामाजिक एकता, शांतता आणि बंधुभावाचे दर्शन घडले.

खिचडी, थंड पाणी आणि चहातून सेवाभावाचा परिचय!

मिरवणुकीत सहभागी झालेल्या अनुयायांच्या सेवेसाठी अल-वाफी चॅरिटेबल ट्रस्टच्या वतीने जुनी चावडी येथील नगर परिषद सभागृहाजवळ खिचडी, थंड पाणी आणि चहाची व्यवस्था करण्यात आली होती. या सेवाभावी उपक्रमामुळे मिरवणुकीत सहभागी झालेल्यांना दिलासा मिळाला, तसेच सामाजिक सलोख्याचा संदेशही पोहोचला.

वंचित बहुजन आघाडीच्या वतीनेही मिरवणुकीत सहभागी झालेल्यांसाठी आवश्यक सुविधांची व्यवस्था करण्यात आली होती.

धार्मिक उत्सवांच्या माध्यमातून सामाजिक सलोखा अधिक दृढ व्हावा, जातीय तेढ दूर होऊन सर्वधर्मीयांमध्ये प्रेम, विश्वास आणि बंधुभाव वाढावा, या उद्देशाने अल-वाफी चॅरिटेबल ट्रस्टच्या वतीने प्रथमच हा सेवाभावी उपक्रम राबविण्यात आल्याची माहिती ट्रस्टचे अध्यक्ष हाजी वजीर कुरेशी यांनी दिली.

सर्वधर्मीय ऐक्याचा संदेश; मान्यवरांची उपस्थिती

या मिरवणुकीत नगरसेवक संजय उमाळे, सज्जाद अहमद (गुफरान), अॅड. वानखडे, गुलाब उमाळे, शांतता समितीचे सदस्य बृजमोहन मंद्रिले, माजी नगराध्यक्ष ऐनोद्दीन खतीब, गजानन महाराज पुरी, अशोक मंडले, गजानन इंगळे, रमेश लोहकरे आणि बंटी किल्लेकर यांच्यासह विविध सामाजिक व राजकीय क्षेत्रांतील मान्यवर उपस्थित होते.

यावेळी अल-वाफी चॅरिटेबल ट्रस्टचे इरफान कुरैशी, इमरान कुरैशी, कासम कुरैशी, समीर कुरैशी, फिरोज कुरैशी आणि इतर सहकाऱ्यांनीही उपस्थित राहून या उपक्रमात सहभाग नोंदविला.

पोलिसांचा चोख बंदोबस्त

धम्मचक्र परिवर्तनाची मिरवणूक शांततेत पार पडावी आणि कायदा व सुव्यवस्थेचा प्रश्न निर्माण होऊ नये, यासाठी पोलिसांनी चोख बंदोबस्त ठेवला होता. ठाणेदार प्रकाश झोडगे, पोलीस उपनिरीक्षक वैशाली पाटील आणि शरद सैदाने यांनी बंदोबस्ताची जबाबदारी सांभाळली.

बाळापूरचा संदेश एकच—धर्म कोणताही असो, माणुसकी सर्वांत मोठी! उत्सव कोणाचाही असो, आनंद आणि बंधुभाव सर्वांचा! अल-वाफी चॅरिटेबल ट्रस्टच्या या उपक्रमातून सर्वधर्मीय ऐक्य आणि सामाजिक सलोख्याचा सुंदर संदेश देण्यात आला.