Akola RTO :वाहतुकीचे नियम मोडाल तर सावधान! अकोला आरटीओची आता ड्रोनद्वारे नजर

Akola RTO : राष्ट्रीय महामार्गावरील वाहतूक सुरळीत ठेवण्यासाठी आणि अपघातांना आळा घालण्यासाठी अकोला प्रादेशिक परिवहन कार्यालयाने (आरटीओ) आधुनिक तंत्रज्ञानाचा वापर करण्याचा पुढाकार घेतला आहे. वाहतुकीचे नियम मोडणाऱ्या वाहनांवर ड्रोनच्या माध्यमातून लक्ष ठेवून नियमानुसार कारवाई करण्यात येणार आहे. प्रादेशिक परिवहन अधिकारी रवींद्र भुयार यांच्या संकल्पनेतून हा उपक्रम राबविण्यात येत असून, राज्यात अशा प्रकारे ड्रोन तंत्रज्ञानाचा वापर करणारे अकोला आरटीओ पहिले कार्यालय ठरल्याचा दावा करण्यात आला आहे.

 आरटीओ रवींद्र भुयार यांच्या संकल्पनेतून आधुनिक तंत्रज्ञानाचा वापर; नियमभंग करणाऱ्या वाहनचालकांवर कारवाईचा इशारा

आगाखान पठाण

अकोला  : राष्ट्रीय महामार्गावरील वाहतूक सुरळीत ठेवण्यासाठी आणि अपघातांना आळा घालण्यासाठी अकोला प्रादेशिक परिवहन कार्यालयाने (आरटीओ) आधुनिक तंत्रज्ञानाचा वापर करण्याचा पुढाकार घेतला आहे. वाहतुकीचे नियम मोडणाऱ्या वाहनांवर ड्रोनच्या माध्यमातून लक्ष ठेवून नियमानुसार कारवाई करण्यात येणार आहे. प्रादेशिक परिवहन अधिकारी रवींद्र भुयार यांच्या संकल्पनेतून हा उपक्रम राबविण्यात येत असून, राज्यात अशा प्रकारे ड्रोन तंत्रज्ञानाचा वापर करणारे अकोला आरटीओ पहिले कार्यालय ठरल्याचा दावा करण्यात आला आहे.

मोटार वाहन कायद्यानुसार वाहनचालकांसाठी विविध वाहतूक नियम निश्चित करण्यात आले आहेत. मात्र, घाई, निष्काळजीपणा आणि नियमांकडे दुर्लक्ष यामुळे अनेकदा या नियमांचे उल्लंघन केले जाते. परिणामी, रस्ते अपघातांचा धोका वाढतो. या पार्श्वभूमीवर अकोला आरटीओने वाहतूक नियमांची प्रभावी अंमलबजावणी करण्यासाठी ड्रोन तंत्रज्ञानाचा वापर करण्याचा निर्णय घेतला आहे.

वेगमर्यादेपासून चुकीच्या दिशेने वाहन चालविण्यापर्यंत नियमभंग

वाहतूक नियमांचे उल्लंघन होण्यामागे अनेक कारणे आहेत. निर्धारित वेगमर्यादेपेक्षा अधिक वेगाने वाहन चालविणे, लाल सिग्नल ओलांडणे, मद्यपान करून वाहन चालविणे, दुचाकीवर हेल्मेट न वापरणे, चारचाकी वाहनात सीटबेल्ट न लावणे आणि वाहन चालविताना मोबाईलचा वापर करणे, अशा प्रकारांमुळे अपघातांचा धोका वाढतो.

याशिवाय, चुकीच्या बाजूने वाहन चालविणे, एकेरी मार्गावरील नियमांचे उल्लंघन करणे तसेच क्षमतेपेक्षा अधिक प्रवासी किंवा मालाची वाहतूक करणे, यांसारख्या प्रकारांमुळेही रस्ते सुरक्षेचा प्रश्न गंभीर बनतो. अशा नियमभंगांना आळा घालण्यासाठी वाहनचालकांमध्ये जनजागृती करण्याबरोबरच प्रभावी देखरेख आणि कायदेशीर कारवाईची आवश्यकता आहे.

राष्ट्रीय महामार्गासह शहरातील वाहतुकीवर ड्रोनची नजर

आरटीओ रवींद्र भुयार यांच्या संकल्पनेतून राष्ट्रीय महामार्गावरून धावणाऱ्या वाहनांवर तसेच शहरातील वाहतुकीवर ड्रोनच्या माध्यमातून लक्ष ठेवण्यात येणार आहे. मोटार वाहन निरीक्षकांच्या पथकाद्वारे हा उपक्रम राबविण्यात येणार असून, नियमांचे उल्लंघन करणाऱ्या वाहनचालकांवर नियमानुसार कारवाई करण्याचा इशारा आरटीओ प्रशासनाने दिला आहे.

मोटार वाहन निरीक्षक अनिरुद्ध देवधर, संदीप तायडे आणि सुरेश शिंदे तसेच सहाय्यक मोटार वाहन निरीक्षक विनोद जाधव यांनी या उपक्रमाची माहिती दिली. या पथकामध्ये मोटार वाहन चालक अनिल गुंजकर यांचाही समावेश आहे.

आधुनिक तंत्रज्ञानातून वाहतूक शिस्तीवर भर

प्रादेशिक परिवहन अधिकारी रवींद्र भुयार आणि सहाय्यक उपप्रादेशिक परिवहन अधिकारी मोहम्मद समीर शेख यांच्या मार्गदर्शनाखाली हा उपक्रम राबविण्यात येणार आहे. ड्रोनच्या साहाय्याने वाहतुकीवर देखरेख ठेवल्यामुळे नियमभंग करणाऱ्या वाहनांची ओळख पटविण्यास आणि वाहतूक नियमांची अंमलबजावणी अधिक प्रभावी करण्यास मदत होईल, अशी अपेक्षा व्यक्त करण्यात येत आहे.

वाहतूक नियमांचे पालन करणे ही प्रत्येक वाहनचालकाची जबाबदारी आहे. स्वतःचा आणि इतरांचा जीव सुरक्षित ठेवण्यासाठी वेगमर्यादेचे पालन, हेल्मेट व सीटबेल्टचा वापर आणि वाहतुकीच्या संकेतांचे पालन करणे अत्यावश्यक आहे. आधुनिक तंत्रज्ञानाच्या मदतीने वाहतूक नियमांची अंमलबजावणी अधिक कडक करण्याच्या अकोला आरटीओच्या या उपक्रमामुळे नियमभंग करणाऱ्या वाहनचालकांवर नियंत्रण येण्यास मदत होईल, अशी अपेक्षा व्यक्त केली जात आहे.