Loan waiver: कर्जमाफी झाली, पण नवीन कर्जाचे दार बंद! ‘निल’ दाखल्यासाठी शेतकऱ्यांची बँकांत फरफट

Loan waiver: राज्य शासनाने शेतकरी कर्जमाफीची घोषणा करून त्याची अंमलबजावणी केल्याचा दावा केला जात असला, तरी प्रत्यक्षात अनेक शेतकऱ्यांना कर्जमाफीचा लाभ मिळूनही नवीन पीककर्जासाठी बँकांचे उंबरठे झिजवावे लागत आहेत. जुन्या कर्जाची परतफेड झाल्याचा पुरावा म्हणून आवश्यक असलेला ‘निल’ दाखला (NOC) मिळविण्यासाठीही शेतकऱ्यांना अडचणींचा सामना करावा लागत आहे. बँकांच्या या कारभारामुळे शेतकरी आर्थिक संकटात सापडले असून, पात्र शेतकऱ्यांना तातडीने नवीन कर्ज उपलब्ध करून द्यावे, अशी मागणी शिवसेना उद्धव बाळासाहेब ठाकरे गटाचे जावेद खान ठेकेदार यांनी केली आहे.

 कर्जमाफीचा लाभ कागदावरच? नवीन पीककर्जासाठी शेतकऱ्यांची वणवण; जावेद खान ठेकेदार आक्रमक

डोणगाव  : राज्य शासनाने शेतकरी कर्जमाफीची घोषणा करून त्याची अंमलबजावणी केल्याचा दावा केला जात असला, तरी प्रत्यक्षात अनेक शेतकऱ्यांना कर्जमाफीचा लाभ मिळूनही नवीन पीककर्जासाठी बँकांचे उंबरठे झिजवावे लागत आहेत. जुन्या कर्जाची परतफेड झाल्याचा पुरावा म्हणून आवश्यक असलेला ‘निल’ दाखला (NOC) मिळविण्यासाठीही शेतकऱ्यांना अडचणींचा सामना करावा लागत आहे. बँकांच्या या कारभारामुळे शेतकरी आर्थिक संकटात सापडले असून, पात्र शेतकऱ्यांना तातडीने नवीन कर्ज उपलब्ध करून द्यावे, अशी मागणी शिवसेना उद्धव बाळासाहेब ठाकरे गटाचे जावेद खान ठेकेदार यांनी केली आहे.

शासनाच्या कर्जमाफी योजनेअंतर्गत पात्र शेतकऱ्यांच्या कर्जाची रक्कम जमा झाल्याचे सांगितले जात असले, तरी प्रत्यक्षात अनेक शेतकऱ्यांना बँकांकडून अपेक्षित सहकार्य मिळत नसल्याच्या तक्रारी आहेत. कर्जमाफीचा लाभ मिळाल्यानंतरही नवीन पीककर्जासाठी अर्ज करताना शेतकऱ्यांना विविध अडचणींना सामोरे जावे लागत आहे. बँकांमध्ये वारंवार चकरा मारूनही त्यांना समाधानकारक उत्तर मिळत नसल्याने शेतकरी त्रस्त झाले आहेत.

तांत्रिक अडचणींचे कारण देत टाळाटाळ?

काही शेतकऱ्यांना बँकांकडून पोर्टलवर नाव अद्ययावत नसल्याचे, तांत्रिक अडचणी असल्याचे किंवा वरिष्ठांचे आदेश प्राप्त झाले नसल्याचे कारण सांगितले जात असल्याच्या तक्रारी आहेत. त्यामुळे कर्जमाफीचा लाभ मिळालेल्या शेतकऱ्यांनाही नवीन कर्ज मिळविण्यासाठी प्रतीक्षा करावी लागत आहे.

जुन्या कर्जाची थकबाकी नसल्याचे प्रमाणित करणारा ‘निल’ दाखला मिळविण्यासाठीही शेतकऱ्यांना अडचणी येत आहेत. हा दाखला उपलब्ध नसल्याने नवीन पीककर्ज मिळविणे किंवा इतर आर्थिक व्यवहार पूर्ण करणे कठीण होत असल्याचे शेतकऱ्यांचे म्हणणे आहे.

शेतीच्या खर्चासाठी पैशांची जुळवाजुळव

शेतीची मशागत, बियाणे, खते आणि अन्य निविष्ठांच्या खरेदीसाठी शेतकऱ्यांना वेळेवर पैशांची आवश्यकता असते. मात्र, कर्जमाफी होऊनही नवीन कर्ज मिळत नसल्याने शेतीचा खर्च भागविताना त्यांची मोठी आर्थिक कोंडी होत आहे. बँकांकडून वेळेत कर्ज उपलब्ध न झाल्यास खासगी सावकारांकडून जास्त व्याजाने पैसे घेण्याची वेळ शेतकऱ्यांवर येण्याची भीती व्यक्त केली जात आहे.

एकीकडे नैसर्गिक संकटांमुळे शेती व्यवसाय अडचणीत असताना दुसरीकडे बँकांकडून कर्ज मिळविण्यासाठी करावी लागणारी धावपळ शेतकऱ्यांच्या अडचणी वाढवत आहे. कर्जमाफीचा लाभ मिळूनही प्रत्यक्षात नवीन कर्जासाठी संघर्ष करावा लागत असल्याने शेतकरी वर्गात नाराजी व्यक्त होत आहे.

पात्र शेतकऱ्यांना तातडीने कर्ज द्या

या समस्येकडे लक्ष वेधण्यासाठी शिवसेना उबाठा गटाचे जावेद खान ठेकेदार, अबरार खान मिल्ली आणि संबंधित शेतकऱ्यांनी बँका व जिल्हा प्रशासनाकडे निवेदनाद्वारे मागण्या मांडल्या आहेत.

कर्जमाफीचा लाभ मिळालेल्या पात्र शेतकऱ्यांना नियमानुसार तातडीने ‘निल’ दाखले देण्यात यावेत, नवीन पीककर्जाचे वितरण विनाविलंब करण्यात यावे आणि अनावश्यक कागदपत्रांच्या नावाखाली शेतकऱ्यांची अडवणूक होऊ नये, अशी मागणी करण्यात आली आहे. तसेच शेतकऱ्यांच्या तक्रारींची दखल घेऊन संबंधित बँकांच्या कामकाजावर प्रशासनाने लक्ष ठेवावे, अशीही मागणी करण्यात आली आहे.

कर्जमाफीची घोषणा आणि प्रत्यक्ष कर्जपुरवठा यामध्ये तफावत राहिल्यास शेतकऱ्यांना त्याचा मोठा आर्थिक फटका बसू शकतो. त्यामुळे शासनाने आणि जिल्हा प्रशासनाने या प्रश्नात तातडीने हस्तक्षेप करून शेतकऱ्यांना दिलासा द्यावा, अशी मागणी डोणगाव परिसरातून होत आहे. आता प्रशासन आणि बँका या प्रश्नावर काय भूमिका घेतात, याकडे शेतकऱ्यांचे लक्ष लागले आहे.