Golden Honor :सुलतानपूरच्या विजयादशमीला कर्तृत्वाचा सुवर्णसन्मान! मोईन काबरा, वामनराव राजगुरू यांना ग्रामरत्न पुरस्कार

Golden Honor : विजयादशमी म्हणजे केवळ सोने लुटण्याचा सण नव्हे, तर ज्ञान, सद्विचार, सत्कर्म आणि समाजसेवेचा गौरव करण्याचा मंगलमय दिवस! याच विचाराची प्रचिती सुलतानपूर येथे दसऱ्याच्या सोनेरी मुहूर्तावर आली. समस्त कष्टकरी संघाच्या वतीने आयोजित ‘ग्रामरत्न पुरस्कार २०२६’ प्रदान सोहळा उत्साहपूर्ण आणि सांस्कृतिक वातावरणात पार पडला. या सोहळ्यात वाचनसंस्कृतीचा ध्यास जोपासणारे वाचनऋषी मोईन हारुण काबरा (कच्छी) आणि आपल्या कर्तृत्वातून आदर्श निर्माण करणारे कर्मयोगी वामनराव जनार्दन राजगुरू यांना ग्रामरत्न पुरस्कार प्रदान करून गौरविण्यात आले.

  ज्ञानसाधना आणि सेवाभावाचा गौरव; दसरा वाटिकेत ग्रामरत्न पुरस्कार सोहळा उत्साहात

भागवत चव्हाण 

कारेगाव : विजयादशमी म्हणजे केवळ सोने लुटण्याचा सण नव्हे, तर ज्ञान, सद्विचार, सत्कर्म आणि समाजसेवेचा गौरव करण्याचा मंगलमय दिवस! याच विचाराची प्रचिती सुलतानपूर येथे दसऱ्याच्या सोनेरी मुहूर्तावर आली. समस्त कष्टकरी संघाच्या वतीने आयोजित ‘ग्रामरत्न पुरस्कार २०२६’ प्रदान सोहळा उत्साहपूर्ण आणि सांस्कृतिक वातावरणात पार पडला. या सोहळ्यात वाचनसंस्कृतीचा ध्यास जोपासणारे वाचनऋषी मोईन हारुण काबरा (कच्छी) आणि आपल्या कर्तृत्वातून आदर्श निर्माण करणारे कर्मयोगी वामनराव जनार्दन राजगुरू यांना ग्रामरत्न पुरस्कार प्रदान करून गौरविण्यात आले.

सुलतानपूर येथील दसरा वाटिकेत आयोजित या सोहळ्यात ज्ञान, संस्कृती आणि सेवाभावाचा अनोखा संगम अनुभवायला मिळाला. गावाच्या सामाजिक, शैक्षणिक, सांस्कृतिक आणि वैचारिक जडणघडणीत योगदान देणाऱ्या व्यक्तींच्या कार्याचा सन्मान करून त्यांच्या कर्तृत्वातून नव्या पिढीला प्रेरणा मिळावी, हा या उपक्रमामागील प्रमुख उद्देश होता. कर्तृत्ववान व्यक्तींना सन्मानाचे व्यासपीठ उपलब्ध करून देणाऱ्या कष्टकरी संघाच्या या उपक्रमाचे ग्रामस्थांकडून कौतुक करण्यात आले.

मान्यवरांच्या हस्ते ग्रामरत्न पुरस्कारांचे वितरण

ग्रामरत्न पुरस्कारांचे वितरण सरपंचपती डॉ. हेमराज लाहोटी, विविध कार्यकारी सहकारी संस्थेचे अध्यक्ष वामनराव झोरे, माऊली मेडिकल कॉलेजचे अध्यक्ष संजय लाहोटी, श्री सिद्धेश्वर महाविद्यालयाचे अध्यक्ष डॉ. वसंतराव देसाई, राष्ट्रीय सेवा संघ सद्भावना मंचाचे शांतीलाल बोराळकर, संतकृपा समूहाचे वसंत जुमडे, आश्रुबा भानापुरे, गजानन भानापुरे, गोविंद रिंढे, राजेश पिंपरकर, मनोहर भानापुरे, महेंद्र पनाड, अर्जुनराव रिंढे, प्रल्हाद टकले, डॉ. विनोद भानापुरे आणि साहेबराव झोरे आदी मान्यवरांच्या हस्ते करण्यात आले.

कार्यक्रमाच्या प्रास्ताविकातून कष्टकरी संघाचे अध्यक्ष सागर पनाड यांनी पुरस्कारार्थींच्या कार्याचा आढावा घेतला. वैभव टकले यांनी सूत्रसंचालन केले. गावातील प्रतिष्ठित नागरिक सुभाष खेत्रे, संजाब खरात, दामोदर लाहोटी, मधुकर भानापुरे, ज्ञानेश्वर हरकाळ, गणेश रत्नपारखी यांच्यासह पोलीस हेड कॉन्स्टेबल शिवानंद केदार आणि राजेश जाधव यांची उपस्थिती होती. कार्यक्रमाच्या यशस्वितेसाठी कष्टकरी संघाचे संघटन सचिव भाऊराव भालेराव यांनी अथक परिश्रम घेतले. माजी सरपंच सुखदेवराव देसाई यांनी आभार मानले.

वाचनसंस्कृतीचा ध्यास जोपासणारे मोईन काबरा

आजच्या डिजिटल युगात तरुणाईचा मोठा वेळ मोबाईलच्या पडद्यावर खर्च होत असताना पुस्तकांच्या सहवासातून ज्ञानाचे विश्व शोधणारे मोईन हारुण काबरा हे सुलतानपूरचे भूषण ठरले आहेत. वाचन ही केवळ आवड नसून ती ज्ञानसाधना आहे, हे त्यांनी आपल्या कार्यातून अधोरेखित केले आहे.

पुस्तकांच्या माध्यमातून ज्ञानाची ज्योत तेवत ठेवत त्यांनी वाचनसंस्कृतीचा ध्यास जोपासला. त्यांच्या अखंड ज्ञानसाधनेची दखल राज्यस्तरावरही घेतली गेली असून, त्यांच्या यशामुळे सुलतानपूरच्या लौकिकात भर पडली आहे. वाचनाची प्रेरणा नव्या पिढीपर्यंत पोहोचविणाऱ्या त्यांच्या कार्याचा गौरव करत कष्टकरी संघाने त्यांना ग्रामरत्न पुरस्काराने सन्मानित केले.

कष्ट, प्रामाणिकपणा आणि माणुसकीचा आदर्श : वामनराव राजगुरू

सामान्य कुटुंबातून पुढे येत कष्ट, प्रामाणिकपणा आणि माणुसकीच्या बळावर आदर्श निर्माण करता येतो, याचे उदाहरण म्हणजे वामनराव जनार्दन राजगुरू. कोणताही गाजावाजा न करता आणि प्रसिद्धीपासून दूर राहून आपल्या कार्यातून आदर्श निर्माण करणारे राजगुरू यांचे व्यक्तिमत्त्व नव्या पिढीसाठी प्रेरणादायी आहे.

त्यांचा सोज्वळ स्वभाव, प्रामाणिक वृत्ती आणि समाजाप्रती असलेली निष्ठा हीच त्यांची खरी श्रीमंती आहे. त्यांच्या कार्याचा गौरव म्हणजे गावातील संस्कार, माणुसकी आणि सेवाभावाचा गौरव असल्याची भावना या सोहळ्यात व्यक्त करण्यात आली. त्यांच्या कर्तृत्वातून समाजाप्रती असलेली बांधिलकी आणि मूल्याधिष्ठित जीवनाचे महत्त्व अधोरेखित झाले.

ज्ञान आणि सेवाभावाच्या परंपरेला उजाळा

विजयादशमीच्या दिवशी शस्त्रपूजनासोबतच ज्ञान आणि विचारांचे प्रतीक असलेल्या शास्त्रपूजनालाही महत्त्व आहे. याच विचारातून समस्त कष्टकरी संघाने दसऱ्याच्या मंगल पर्वावर कर्तृत्ववान व्यक्तींचा सन्मान करण्याची परंपरा जपली आहे.

गावाच्या सामाजिक, शैक्षणिक, सांस्कृतिक आणि वैचारिक जडणघडणीत योगदान देणाऱ्या व्यक्तींना सन्मानित करणे आणि त्यांच्या कार्यातून नव्या पिढीला प्रेरणा मिळवून देणे, हा ग्रामरत्न पुरस्कारामागील उदात्त हेतू आहे.

‘कर्तृत्वाचा सन्मान म्हणजे गावाच्या भविष्याला दिलेली प्रेरणा’ या भावनेतून प्रदान करण्यात आलेला ग्रामरत्न पुरस्कार हा केवळ दोन व्यक्तींचा गौरव नसून सुलतानपूरच्या समृद्ध संस्कृतीचा, वाचनपरंपरेचा आणि सेवाभावाचा सन्मान ठरला. विजयादशमीच्या शुभमुहूर्तावर पार पडलेल्या या सोहळ्याने गावाच्या सामाजिक आणि सांस्कृतिक जीवनात प्रेरणादायी पर्वाची भर घातली. समाजहितासाठी कार्य करणाऱ्या व्यक्तींना प्रोत्साहन देणाऱ्या समस्त कष्टकरी संघाच्या या उपक्रमाचे ग्रामस्थांनी स्वागत केले.