Panjabrao Maharaj Billari :२५ वर्षांच्या निरपेक्ष कीर्तनसेवेचा सन्मान; ह.भ.प. पंजाबराव महाराज बिलारी यांची तालुका सचिवपदी निवड

Panjabrao Maharaj Billari : कीर्तन आणि प्रवचनाच्या माध्यमातून समाजप्रबोधनाचे कार्य कोणत्याही मानधनाची अपेक्षा न ठेवता करणारे ह.भ.प. पंजाबराव महाराज बिलारी यांची महाराष्ट्र प्रदेश निरपेक्ष कीर्तन सेवा संस्थेच्या सिंदखेडराजा तालुका सचिवपदी निवड करण्यात आली आहे. गेल्या २५ वर्षांपासून ग्रामीण भागात निरपेक्षपणे कीर्तनसेवा करणाऱ्या बिलारी महाराज यांच्या कार्याची दखल घेत त्यांच्यावर ही महत्त्वपूर्ण जबाबदारी सोपविण्यात आली आहे.

  मानधनाची अपेक्षा नाही, समाजप्रबोधनाचा ध्यास! पंजाबराव महाराज बिलारी यांच्यावर निरपेक्ष कीर्तन सेवेची जबाबदारी

साखरखेर्डा  : कीर्तन आणि प्रवचनाच्या माध्यमातून समाजप्रबोधनाचे कार्य कोणत्याही मानधनाची अपेक्षा न ठेवता करणारे ह.भ.प. पंजाबराव महाराज बिलारी यांची महाराष्ट्र प्रदेश निरपेक्ष कीर्तन सेवा संस्थेच्या सिंदखेडराजा तालुका सचिवपदी निवड करण्यात आली आहे. गेल्या २५ वर्षांपासून ग्रामीण भागात निरपेक्षपणे कीर्तनसेवा करणाऱ्या बिलारी महाराज यांच्या कार्याची दखल घेत त्यांच्यावर ही महत्त्वपूर्ण जबाबदारी सोपविण्यात आली आहे.

मानधनाविना समाजप्रबोधनाचा ध्यास

महाराष्ट्र प्रदेश निरपेक्ष कीर्तन सेवा संस्थेचे पदाधिकारी कीर्तन आणि प्रवचनाच्या माध्यमातून समाजाला आध्यात्मिक विचारांची तसेच सामाजिक मूल्यांची शिकवण देतात. या कार्यासाठी कोणतीही फी किंवा मानधन न घेता निःशुल्क समाजप्रबोधन करणे, हे संस्थेच्या कार्याचे वैशिष्ट्य आहे.

ह.भ.प. पंजाबराव महाराज बिलारी हेही गेल्या २५ वर्षांपासून ग्रामीण भागात कीर्तनाच्या माध्यमातून समाजप्रबोधनाचे कार्य करीत आहेत. अध्यात्म, परमार्थ आणि सामाजिक जाणीव यांची सांगड घालत त्यांनी निरपेक्ष कीर्तनसेवेचा वसा जपला आहे. त्यांच्या या दीर्घकालीन कार्याची दखल घेत संस्थेने त्यांची सिंदखेडराजा तालुका सचिवपदी निवड केली आहे.

मान्यवरांच्या स्वाक्षरीचे नियुक्तिपत्र

संस्थेचे संस्थापक राष्ट्रीय अध्यक्ष ह.भ.प. नाना महाराज कापडणीस (नाशिक), संस्थापक सचिव ह.भ.प. साहेबराव महाराज गवळी (संभाजीनगर), महाराष्ट्र प्रदेशाध्यक्ष ह.भ.प. माऊली महाराज गरूड (पंढरपूर) आणि महिला प्रदेशाध्यक्षा ह.भ.प. गायत्रीताई महाराज कोंडे-देशमुख (पुणे) यांच्या स्वाक्षरीचे नियुक्तिपत्र पंजाबराव महाराज बिलारी यांना प्रदान करण्यात आले आहे.

या नियुक्तिपत्रात संस्थेच्या ध्येयधोरणांनुसार परमार्थ, संकीर्तन आणि प्रबोधनात्मक कार्य निरपेक्षपणे करावे, तसेच कोणतीही दक्षिणा किंवा पैसे न मागता समाजसेवेचे कार्य पुढे सुरू ठेवावे, असे नमूद करण्यात आले आहे.

मान्यवरांकडून अभिनंदन

ह.भ.प. पंजाबराव महाराज बिलारी यांच्या निवडीबद्दल ह.भ.प. डिगांबर गाडे महाराज, ह.भ.प. गणेशराव इंगळे महाराज, ह.भ.प. कैलास महाराज निर्मळ यांच्यासह अनेक मान्यवरांनी त्यांचे अभिनंदन केले आहे. त्यांच्या या निवडीमुळे परिसरातील वारकरी संप्रदाय आणि कीर्तनप्रेमींमध्ये आनंद व्यक्त होत आहे.