81 polling stations: शिक्षक मतदारसंघ निवडणुकीसाठी ८१ मतदान केंद्रांना आयोगाची मान्यता; बुलढाणा जिल्ह्यात १८ केंद्रे

81 polling stations: महाराष्ट्र विधान परिषदेच्या अमरावती विभाग शिक्षक मतदारसंघाच्या निवडणूक-२०२६ साठी अमरावती विभागातील पाच जिल्ह्यांमध्ये एकूण ८१ मतदान केंद्रे स्थापन करण्याच्या प्रस्तावाला भारत निवडणूक आयोगाने मान्यता दिली आहे. यामध्ये बुलढाणा जिल्ह्यातील १८ मतदान केंद्रांचा समावेश आहे. ही माहिती अमरावती विभाग शिक्षक मतदारसंघाच्या निवडणूक निर्णय अधिकारी तथा विभागीय आयुक्त नयना गुंडे यांनी दिली.

   अमरावती विभाग शिक्षक मतदारसंघाची निवडणूक तयारी वेगात; पाच जिल्ह्यांतील मतदान केंद्रे निश्चित

गजानन तिडके 

बुलढाणा : महाराष्ट्र विधान परिषदेच्या अमरावती विभाग शिक्षक मतदारसंघाच्या निवडणूक-२०२६ साठी अमरावती विभागातील पाच जिल्ह्यांमध्ये एकूण ८१ मतदान केंद्रे स्थापन करण्याच्या प्रस्तावाला भारत निवडणूक आयोगाने मान्यता दिली आहे. यामध्ये बुलढाणा जिल्ह्यातील १८ मतदान केंद्रांचा समावेश आहे. ही माहिती अमरावती विभाग शिक्षक मतदारसंघाच्या निवडणूक निर्णय अधिकारी तथा विभागीय आयुक्त नयना गुंडे यांनी दिली.

अमरावती विभाग शिक्षक मतदारसंघाच्या निवडणुकीसाठी मतदान केंद्रे निश्चित करण्याबाबतचा प्रस्ताव भारत निवडणूक आयोगाकडे पाठविण्यात आला होता. या प्रस्तावाला आयोगाने मान्यता दिली असल्याचे उपसचिव तथा सहमुख्य निवडणूक अधिकारी, महाराष्ट्र राज्य, सामान्य प्रशासन विभाग, मंत्रालय, मुंबई यांनी पत्राद्वारे विभागीय आयुक्तांना कळविले आहे.

जिल्हानिहाय मतदान केंद्रांची संख्या

अमरावती विभाग शिक्षक मतदारसंघातील पाच जिल्ह्यांमध्ये मतदान केंद्रांची संख्या पुढीलप्रमाणे आहे.

• अमरावती : २५ मतदान केंद्रे
• अकोला : १३ मतदान केंद्रे
• बुलढाणा : १८ मतदान केंद्रे
• वाशिम : ७ मतदान केंद्रे
• यवतमाळ : १८ मतदान केंद्रे

अशा प्रकारे संपूर्ण अमरावती विभागात एकूण ८१ मतदान केंद्रांना मान्यता मिळाली आहे.

२३ ऑक्टोबरला मतदान

अमरावती विभाग शिक्षक मतदारसंघाच्या निवडणुकीसाठी येत्या २३ ऑक्टोबर रोजी मतदान होणार आहे. विभागातील मान्यताप्राप्त मतदान केंद्रांवर सकाळी ८ ते सायंकाळी ४ वाजेपर्यंत मतदानाची प्रक्रिया पार पडणार आहे.

मतदान केंद्रांच्या प्रस्तावाला मान्यता मिळाल्याने निवडणूक प्रक्रियेच्या तयारीतील महत्त्वाचा टप्पा पूर्ण झाला आहे. आता शिक्षक मतदारसंघाच्या निवडणुकीकडे अमरावती विभागातील शिक्षक मतदारांचे लक्ष लागले आहे.