Operation Prahar: ऑपरेशन प्रहारचा दणका! दुबेवाडीत अवैध गॅस रिफिलिंग अड्ड्यावर छापा; ९.४२ लाखांचा मुद्देमाल जप्त

Operation Prahar: घरगुती वापराच्या गॅस सिलेंडरमधून ऑटोमध्ये अवैधरीत्या गॅस भरणाऱ्या रिफिलिंग अड्ड्यावर अकोला शहर पोलिसांनी ‘ऑपरेशन प्रहार’ अंतर्गत मोठी कारवाई केली. सिव्हिल लाईन पोलीस ठाण्याच्या हद्दीतील दुबेवाडी परिसरात गुरुवारी (८ ऑक्टोबर) करण्यात आलेल्या छाप्यात ५८ गॅस सिलेंडर, तीन वाहने, रिफिलिंगचे साहित्य आणि रोख रक्कम असा एकूण ९ लाख ४२ हजार ३५० रुपयांचा मुद्देमाल जप्त करण्यात आला. या कारवाईत तिघांना पोलिसांनी ताब्यात घेतले आहे.

 घरगुती गॅसचा ऑटोमध्ये काळाबाजार; पोलिसांच्या छाप्यात तिघे ताब्यात, ५८ सिलेंडर जप्त

अकोला : घरगुती वापराच्या गॅस सिलेंडरमधून ऑटोमध्ये अवैधरीत्या गॅस भरणाऱ्या रिफिलिंग अड्ड्यावर अकोला शहर पोलिसांनी ‘ऑपरेशन प्रहार’ अंतर्गत मोठी कारवाई केली. सिव्हिल लाईन पोलीस ठाण्याच्या हद्दीतील दुबेवाडी परिसरात गुरुवारी (८ ऑक्टोबर) करण्यात आलेल्या छाप्यात ५८ गॅस सिलेंडर, तीन वाहने, रिफिलिंगचे साहित्य आणि रोख रक्कम असा एकूण ९ लाख ४२ हजार ३५० रुपयांचा मुद्देमाल जप्त करण्यात आला. या कारवाईत तिघांना पोलिसांनी ताब्यात घेतले आहे.

घरगुती वापराच्या गॅस सिलेंडरमधून ऑटोमध्ये अवैधरीत्या गॅस भरण्याच्या प्रकारांबाबत पोलिसांना तक्रारी प्राप्त होत होत्या. अशा अवैध रिफिलिंग केंद्रांवर कारवाई करून त्यांचे उच्चाटन करण्याच्या सूचना अकोला जिल्ह्याचे पोलीस अधीक्षक अर्चित चांडक यांनी दिल्या होत्या. त्यानुसार शहर विभागाचे उपविभागीय पोलीस अधिकारी सुदर्शन पाटील यांच्या मार्गदर्शनाखाली पथकाने मिळालेल्या विश्वसनीय माहितीच्या आधारे दुबेवाडी येथे कारवाई केली.

पोलिस पथकाने छापा टाकला असता मनोज रमेश दीक्षित (वय ३६, रा. रेल्वे स्टेशनजवळ, अकोला) हा पंप मशीनच्या सहाय्याने घरगुती वापराच्या गॅस सिलेंडरमधील गॅस ऑटोमध्ये अवैधरित्या भरताना आढळून आला. तसेच बिस्मिल्ला खान रहेमान खान (वय २९) आणि मोहम्मद आसिफ शेख जुम्मा (वय २७) हे त्यांच्या ऑटोमध्ये घरगुती गॅस सिलेंडरमधून गॅस भरून घेत असल्याचे पोलिसांच्या निदर्शनास आले.

तीन वाहनांसह ५८ सिलेंडर जप्त

छापा कारवाईदरम्यान पोलिसांनी महिंद्रा मालवाहू वाहन क्रमांक एमएच ३० बीडी ०८४४, ऑटो क्रमांक एमएच ३० बीजी ०३७८ आणि ऑटो क्रमांक एमएच ३० बीसी २४४० अशी तीन वाहने जप्त केली. या वाहनांची अंदाजे किंमत ८ लाख रुपये असल्याचे पोलिसांनी सांगितले.

याशिवाय ५८ गॅस सिलेंडर, रिफिलिंगचे साहित्य आणि १ लाख ४२ हजार ३५० रुपये रोख, असा मुद्देमाल जप्त करण्यात आला. वाहनांसह जप्त केलेल्या सर्व मुद्देमालाची एकूण किंमत ९ लाख ४२ हजार ३५० रुपये असल्याचे पोलिसांनी नमूद केले.

तिघांविरुद्ध गुन्हा दाखल करण्याची प्रक्रिया

या कारवाईत ताब्यात घेण्यात आलेल्या तिन्ही आरोपींविरुद्ध जीवनावश्यक वस्तू अधिनियमातील कलम ३ व ७ तसेच बीएनएस कलम २८८ अन्वये सिव्हिल लाईन पोलीस ठाण्यात गुन्हा दाखल करण्याची प्रक्रिया सुरू आहे. घरगुती वापराच्या गॅसचा अशा प्रकारे व्यावसायिक व अवैध वापर होत असल्याने या कारवाईकडे गांभीर्याने पाहिले जात आहे.

वरिष्ठांच्या मार्गदर्शनाखाली कारवाई

ही कारवाई पोलीस अधीक्षक अर्चित चांडक, अपर पोलीस अधीक्षक चंद्रकांत रेड्डी आणि उपविभागीय पोलीस अधिकारी सुदर्शन पाटील यांच्या मार्गदर्शनाखाली करण्यात आली. कारवाईत सहायक पोलीस निरीक्षक किशोर पवार, पोलीस उपनिरीक्षक रत्नदीप पळसपगार, तसेच पोलीस अंमलदार रविंद्र घिवे, विनय जाधव, मोहम्मद नदिम, प्रफुल्ल बांगर आणि गोपाल बायस्कर यांनी सहभाग घेतला.

अवैध गॅस रिफिलिंगमुळे मोठा धोका निर्माण होण्याची शक्यता असते. त्यामुळे अशा प्रकारच्या केंद्रांवर पोलिसांकडून करण्यात येणाऱ्या कारवाईमुळे अवैध गॅस रिफिलिंग करणाऱ्यांमध्ये खळबळ उडाली आहे.