Digging :गुप्तधनाच्या शोधात रात्री शेतात जेसीबीने खोदकाम? दोघे पोलिसांच्या ताब्यात

Digging : अकोला रोडलगत एका शेतामध्ये रात्रीच्या अंधारात जेसीबीच्या साहाय्याने मोठा खड्डा खोदून गुप्तधन काढण्याचा प्रयत्न सुरू असल्याची माहिती पातूर पोलिसांना मिळाली. या माहितीच्या आधारे पोलिसांनी तातडीने घटनास्थळी धाव घेत कारवाई केली. यावेळी शेतात जेसीबीच्या साहाय्याने खोदकाम सुरू असल्याचे पोलिसांच्या निदर्शनास आले.

  अकोला रोडवरील शेतात रात्री जेसीबीचा धडाका; गुप्तधनाच्या संशयाने पातूर पोलिसांची कारवाई

राहुल सोनोने 

पातूर : अकोला रोडलगत एका शेतामध्ये रात्रीच्या अंधारात जेसीबीच्या साहाय्याने मोठा खड्डा खोदून गुप्तधन काढण्याचा प्रयत्न सुरू असल्याची माहिती पातूर पोलिसांना मिळाली. या माहितीच्या आधारे पोलिसांनी तातडीने घटनास्थळी धाव घेत कारवाई केली. यावेळी शेतात जेसीबीच्या साहाय्याने खोदकाम सुरू असल्याचे पोलिसांच्या निदर्शनास आले.

पोलिसांचे पथक घटनास्थळी पोहोचताच तेथे उपस्थित असलेले काही जण पसार होण्याच्या प्रयत्नात असल्याची माहिती आहे. पोलिसांनी त्यांचा पाठलाग करून जेसीबी ताब्यात घेतला. तसेच या प्रकरणी दोघांना ताब्यात घेऊन त्यांची चौकशी सुरू केली आहे.

दरम्यान, संबंधित शेतात नेमक्या कोणत्या कारणासाठी एवढे मोठे खोदकाम करण्यात येत होते, याचा तपास पोलिसांकडून सुरू आहे. गुप्तधन काढण्यासाठीच हा प्रकार सुरू होता का, याचीही चौकशी केली जात आहे. घटनास्थळावरील खोदकामाचे स्वरूप, त्यासाठी जेसीबीचा वापर करण्यामागील उद्देश आणि संबंधित व्यक्तींची भूमिका याबाबत पोलिसांकडून माहिती घेतली जात आहे.

पातूर परिसरात गुप्तधन काढण्यासाठी रात्रीच्या वेळी शेतात खोदकाम सुरू असल्याची चर्चा सोशल मीडियावरही सुरू झाली होती. मात्र, या चर्चेला अद्याप पोलिसांकडून अधिकृत दुजोरा मिळालेला नाही. त्यामुळे प्रत्यक्षात खोदकाम नेमक्या कोणत्या कारणासाठी करण्यात आले, हे पोलिसांच्या चौकशीनंतरच स्पष्ट होणार आहे.

चौकशीनंतर कारवाईची दिशा स्पष्ट होणार

गुप्तधन काढण्याच्या उद्देशाने खोदकाम करण्यात आले होते की अन्य कोणत्या कारणासाठी खड्डा खोदण्यात आला, याचा तपास पातूर पोलिसांकडून केला जात आहे. ताब्यात घेतलेल्या दोघांकडून मिळणाऱ्या माहितीनंतर या प्रकरणातील इतर बाबी स्पष्ट होण्याची शक्यता आहे. तसेच या प्रकारात आणखी कोणाचा सहभाग आहे का, याचाही पोलिसांकडून शोध घेतला जात आहे.