Impressive performance :पातूरच्या आखाड्यातील तिन्ही मल्लांची दमदार बाजी; विभागीय स्पर्धेत सुवर्ण कामगिरी

Impressive performance : अमरावती येथील जिल्हा क्रीडा संकुलात पार पडलेल्या शालेय विभागीय कुस्ती स्पर्धेत पातूर येथील श्री सिदाजी महाराज व्यायामशाळेच्या तीन मल्लांनी दमदार कामगिरी करत आपापल्या वजन गटात प्रथम क्रमांक पटकावला. या उल्लेखनीय कामगिरीच्या जोरावर तिन्ही मल्लांची राज्यस्तरीय कुस्ती स्पर्धेसाठी निवड झाली आहे.

लावण्या, सोनल आणि पृथ्वीराजची राज्यस्तरावर झेप; श्री सिदाजी महाराज व्यायामशाळेचा डंका

पातूर : अमरावती येथील जिल्हा क्रीडा संकुलात पार पडलेल्या शालेय विभागीय कुस्ती स्पर्धेत पातूर येथील श्री सिदाजी महाराज व्यायामशाळेच्या तीन मल्लांनी दमदार कामगिरी करत आपापल्या वजन गटात प्रथम क्रमांक पटकावला. या उल्लेखनीय कामगिरीच्या जोरावर तिन्ही मल्लांची राज्यस्तरीय कुस्ती स्पर्धेसाठी निवड झाली आहे.

या स्पर्धेत लावण्या गाडगे हिने ३० किलो वजन गटात, सोनल ठाकरे हिने ३९ किलो वजन गटात, तर पृथ्वीराज यादव याने ६७ किलो वजन गटात प्रतिस्पर्ध्यांवर मात करत प्रथम क्रमांक मिळविला. तिन्ही मल्लांनी उत्कृष्ट डावपेच, आक्रमक खेळ आणि आत्मविश्वासाच्या जोरावर आपापल्या वजन गटात अव्वल स्थान मिळवत राज्यस्तरीय स्पर्धेतील प्रवेश निश्चित केला.

या यशामुळे श्री सिदाजी महाराज व्यायामशाळेच्या शिरपेचात आणखी एक मानाचा तुरा रोवला गेला आहे. ग्रामीण भागातील मल्लांना योग्य मार्गदर्शन, नियमित सराव आणि स्पर्धेचे व्यासपीठ मिळाल्यास ते राज्यस्तरावरही उल्लेखनीय कामगिरी करू शकतात, हे या तिन्ही मल्लांच्या यशातून अधोरेखित झाले आहे.

या यशाचे श्रेय श्री सिदाजी महाराज व्यायामशाळा, पातूरचे वस्ताद चंदू वानखडे, तसेच कोच अक्षय तायडे आणि निलेश गाडगे यांना देण्यात आले. मल्लांच्या यशामागे त्यांच्या आई-वडिलांचे प्रोत्साहन, मंगेश गाडगे आणि मित्रपरिवाराचे सहकार्यही महत्त्वाचे ठरले.

राज्यस्तरावर निवड झालेल्या तिन्ही मल्लांचे श्री सिदाजी महाराज व्यायामशाळा, पातूर यांच्या वतीने अभिनंदन करण्यात आले असून, आगामी राज्यस्तरीय स्पर्धेसाठी त्यांना शुभेच्छा देण्यात आल्या.