Suresh Devkar: शिक्षकांच्या हक्कांसाठी शिक्षक भारतीच सर्वोत्तम पर्याय : सुरेश देवकर

Suresh Devkar: शिक्षकांच्या प्रलंबित प्रश्नांवर सातत्याने आवाज उठविणाऱ्या शिक्षक भारतीने यापुढेही केवळ आश्वासनांवर न थांबता शिक्षकांच्या हक्कांसाठी अविरत संघर्ष करण्याची भूमिका घेतली आहे. सध्या शिक्षक विविध समस्यांनी त्रस्त असून, या प्रश्नांना शासन दरबारी प्रभावीपणे मांडण्याची ताकद संघटित शिक्षक चळवळीतच असल्याचा दावा अमरावती शिक्षक मतदारसंघातील शिक्षक भारतीचे अधिकृत उमेदवार सुरेश देवकर यांनी केला.

पेन्शनपासून कला-क्रीडा शिक्षकांच्या सेवास्थैर्यापर्यंत; सुरेश देवकर यांचा प्रश्नांवर ‘रोखठोक’ अजेंडा, ५ ऑक्टोबरला सुरेश देवकर उमेदवारी अर्ज दाखल करणार

बुलढाणा : शिक्षकांच्या प्रलंबित प्रश्नांवर सातत्याने आवाज उठविणाऱ्या शिक्षक भारतीने यापुढेही केवळ आश्वासनांवर न थांबता शिक्षकांच्या हक्कांसाठी अविरत संघर्ष करण्याची भूमिका घेतली आहे. सध्या शिक्षक विविध समस्यांनी त्रस्त असून, या प्रश्नांना शासन दरबारी प्रभावीपणे मांडण्याची ताकद संघटित शिक्षक चळवळीतच असल्याचा दावा अमरावती शिक्षक मतदारसंघातील शिक्षक भारतीचे अधिकृत उमेदवार सुरेश देवकर यांनी केला.

शिक्षकांच्या हक्कांसाठी आणि सन्मानासाठी शिक्षक भारतीच शिक्षकांसमोरील सर्वोत्तम पर्याय असल्याचे सांगत, ५ ऑक्टोबर रोजी उमेदवारी अर्ज दाखल करणार असल्याची माहिती देवकर यांनी दिली. शिक्षकांनी आपल्या प्रलंबित प्रश्नांचा गांभीर्याने विचार करून शिक्षक भारतीला पहिल्या पसंतीक्रमाचे मत द्यावे, असे आवाहनही त्यांनी केले.

शुक्रवार, २ ऑक्टोबर रोजी शिक्षक भारतीचे अधिकृत उमेदवार सुरेश देवकर यांनी बुलढाणा येथे पत्रकारांशी संवाद साधत आपली भूमिका स्पष्ट केली. यावेळी शिक्षक भारतीचे बुलढाणा जिल्हाध्यक्ष अशोक खोरखेडे आणि डी. डी. वायाळ यांची प्रमुख उपस्थिती होती.

यावेळी देवकर यांनी अमरावती शिक्षक मतदारसंघातील निवडणूक प्रक्रिया आणि शिक्षकांच्या मतदानाच्या पसंतीक्रमाबाबतही भूमिका मांडली. ही निवडणूक एकल संक्रमणीय मतदान पद्धतीने होत असल्याने शिक्षकांनी मतदानाबाबत संभ्रम बाळगण्याची गरज नसल्याचे त्यांनी सांगितले. बुलढाण्यातील शिक्षकांना आपल्या पसंतीक्रमानुसार १, २, ३, ४ अशा क्रमाने पसंती नोंदविता येते. पाचही जिल्ह्यांमध्ये पोहोच असलेला आणि सर्वसमावेशक पद्धतीने शिक्षकांचे प्रश्न मांडू शकणारा उमेदवार निवडणे गरजेचे असल्याचे देवकर म्हणाले.

पेन्शनचा प्रश्न अग्रक्रमावर

जुनी पेन्शन योजना, सुमारे २६ हजार शिक्षकांचा पेन्शनशी संबंधित प्रश्न तसेच कमी टक्केवारीवर निवृत्त झालेल्या शिक्षकांच्या निवृत्तीवेतनाचा प्रश्न हे आपल्या प्राधान्यक्रमातील मुद्दे असल्याचे सुरेश देवकर यांनी स्पष्ट केले. शिक्षकांच्या प्रश्नांबाबत शासनाचे प्रयत्न अपुरे पडत असल्याची भूमिका मांडत, निवडून आल्यानंतर सामान्य शिक्षकांचा आवाज शासन दरबारी बुलंदपणे पोहोचविण्यासाठी सातत्याने पाठपुरावा करण्याचा निर्धार त्यांनी व्यक्त केला.

कला-क्रीडा शिक्षकांच्या सेवास्थैर्याचा मुद्दा

शाळेच्या सर्वांगीण विकासासाठी कला आणि क्रीडा शिक्षकांची भूमिका महत्त्वाची आहे. कला, क्रीडा, साहित्य आणि शारीरिक विकासाच्या माध्यमातून विद्यार्थ्यांच्या व्यक्तिमत्त्वाला आकार मिळतो. मात्र कला-क्रीडा शिक्षकांना सेवास्थैर्य नसल्याने त्यांच्या भवितव्याचा प्रश्न निर्माण झाला आहे, अशी भूमिका देवकर यांनी मांडली.

कला-क्रीडा शिक्षकांना कायम सेवेत घेण्यात यावे, तसेच विज्ञान परिचरांची कमी झालेली पदे पुन्हा भरण्यात यावीत, अशी मागणीही त्यांनी केली. शिक्षकांच्या प्रश्नांना केवळ आश्वासनांपुरते मर्यादित न ठेवता त्यासाठी संघटितपणे संघर्ष करण्याची भूमिका शिक्षक भारतीने घेतली असल्याचे सुरेश देवकर यांनी स्पष्ट केले.