Cleanliness survey:  पिण्याच्या पाण्याच्या स्रोतांचे स्वच्छता सर्वेक्षण अभियान; १ ते ३१ ऑक्टोबरदरम्यान जिल्हाभर मोहीम

Cleanliness survey: ग्रामीण भागातील नागरिकांना सुरक्षित व शुद्ध पिण्याचे पाणी उपलब्ध करून देण्यासाठी पिण्याच्या पाण्याच्या स्रोतांची स्वच्छता व सुरक्षितता अत्यंत महत्त्वाची आहे. याच पार्श्वभूमीवर बुलढाणा जिल्ह्यातील सर्व गावांमधील सार्वजनिक पिण्याच्या पाण्याच्या स्रोतांचे स्वच्छता सर्वेक्षण अभियान दि. १ ते ३१ ऑक्टोबर २०२६ या कालावधीत राबविण्यात येणार आहे. हे अभियान प्रभावीपणे राबवावे, असे आवाहन जिल्हा परिषद बुलढाणाचे मुख्य कार्यकारी अधिकारी गुलाबराव खरात यांनी केले आहे. तसेच सलग पाच वर्षे उत्कृष्ट काम करणाऱ्या ग्रामपंचायतींना ‘चंदेरी कार्ड’ देण्यात येणार आहे.

  सलग पाच वर्षे उत्कृष्ट काम करणाऱ्या ग्रामपंचायतींना ‘चंदेरी कार्ड’; सीईओ गुलाबराव खरात यांचे आवाहन

बुलढाणा  : ग्रामीण भागातील नागरिकांना सुरक्षित व शुद्ध पिण्याचे पाणी उपलब्ध करून देण्यासाठी पिण्याच्या पाण्याच्या स्रोतांची स्वच्छता व सुरक्षितता अत्यंत महत्त्वाची आहे. याच पार्श्वभूमीवर बुलढाणा जिल्ह्यातील सर्व गावांमधील सार्वजनिक पिण्याच्या पाण्याच्या स्रोतांचे स्वच्छता सर्वेक्षण अभियान दि. १ ते ३१ ऑक्टोबर २०२६ या कालावधीत राबविण्यात येणार आहे. हे अभियान प्रभावीपणे राबवावे, असे आवाहन जिल्हा परिषद बुलढाणाचे मुख्य कार्यकारी अधिकारी गुलाबराव खरात यांनी केले आहे. तसेच सलग पाच वर्षे उत्कृष्ट काम करणाऱ्या ग्रामपंचायतींना ‘चंदेरी कार्ड’ देण्यात येणार आहे.

पिण्याच्या पाण्याची गुणवत्ता चांगली राखण्यासाठी पाण्याचे स्रोत, स्रोत परिसर, पाणीपुरवठा व्यवस्था तसेच देखभाल व व्यवस्थापनाची नियमित तपासणी आवश्यक आहे. या अभियानादरम्यान स्रोत परिसरातील अस्वच्छता, पाइपलाइन गळती, नळगळती, व्हॉल्व्ह गळती, अनियमित क्लोरीनेशन आदी बाबींची तपासणी करण्यात येणार असून, आवश्यक त्या प्रतिबंधात्मक उपाययोजना केल्या जाणार आहेत.

स्रोतांचे जोखमीनुसार वर्गीकरण

अभियानांतर्गत जिल्ह्यातील प्रत्येक गावातील सर्व सार्वजनिक पिण्याच्या पाण्याच्या स्रोतांचे स्वच्छता सर्वेक्षण करण्यात येणार आहे. सर्वेक्षणानंतर स्रोतांच्या स्थितीनुसार त्यांचे तीव्र जोखीम, मध्यम जोखीम आणि सौम्य जोखीम अशा तीन प्रकारांत वर्गीकरण करण्यात येणार आहे. तीव्र व मध्यम जोखीम असलेल्या स्रोतांबाबत तातडीने आवश्यक उपाययोजना करण्याच्या सूचना देण्यात आल्या आहेत.

आरोग्य सेवक व जलसुरक्षकांचा सहभाग

स्वच्छता सर्वेक्षणाचे काम आरोग्य सेवक आणि जलसुरक्षक यांच्या संयुक्त सहभागातून करण्यात येणार आहे. प्रत्येक पिण्याच्या पाण्याच्या स्रोतासाठी निर्धारित नमुना प्रपत्र भरले जाणार आहे. सर्वेक्षण पूर्ण झाल्यानंतर संबंधित स्रोतांची गावनिहाय नोंद शासनाच्या संकेतस्थळावर करण्यात येणार आहे.

संबंधित वैद्यकीय अधिकाऱ्यांनी सर्वेक्षणादरम्यान आकस्मिक भेटी देऊन सर्वेक्षणाच्या कामाची क्रॉस-चेकिंग करावी, अशा सूचना देण्यात आल्या आहेत. तसेच ज्या कार्यक्षेत्रात आरोग्य सेवकांची पदे रिक्त आहेत, तेथे पर्यायी व्यवस्था करून निर्धारित कालावधीत सर्वेक्षणाचे काम पूर्ण करण्याचे निर्देश देण्यात आले आहेत.

१ नोव्हेंबरपर्यंत अहवाल सादर करण्याचे निर्देश

प्राथमिक आरोग्य केंद्र स्तरावर सर्वेक्षण अहवालांचे संकलन करण्यात येणार आहे. त्यानंतर तालुकास्तरावर अहवालांचे संकलन करून संबंधित अधिकाऱ्यांच्या स्वाक्षरीसह जिल्हा पाणी व स्वच्छता मिशन कक्ष, जिल्हा परिषद बुलढाणा यांच्याकडे सादर करण्यात येणार आहे. सर्व अहवाल दि. १ नोव्हेंबर २०२६ पर्यंत सादर करण्याच्या सूचना देण्यात आल्या आहेत.

‘चंदेरी कार्ड’ने ग्रामपंचायतींचा गौरव

पिण्याच्या पाण्याच्या स्रोतांची स्वच्छता, सुरक्षितता आणि व्यवस्थापनाच्या क्षेत्रात सलग पाच वर्षे उत्कृष्ट काम करणाऱ्या ग्रामपंचायतींना ‘चंदेरी कार्ड’ देण्यात येणार आहे. त्यामुळे ग्रामपंचायतींना पाणी स्रोतांच्या स्वच्छता व सुरक्षिततेच्या कामात सातत्य राखण्यासाठी प्रोत्साहन मिळणार आहे.

सुरक्षित व शुद्ध पिण्याचे पाणी हे निरोगी समाजासाठी अत्यावश्यक आहे. त्यामुळे पिण्याच्या पाण्याच्या स्रोतांची स्वच्छता व सुरक्षितता राखण्यासाठी सर्व संबंधित यंत्रणांनी या अभियानात प्रभावी सहभाग नोंदवावा, असे आवाहन करण्यात आले आहे.

सदर अभियानाचे नियंत्रण जल जीवन मिशन, जिल्हा परिषद बुलढाणाचे प्रकल्प संचालक सतीश देशमुख यांच्या नियंत्रणाखाली करण्यात येत आहे.