Sunil Wankhade :जबाबदारीचे भान ठेवून धार्मिक उत्सव साजरे करा; ठाणेदार सुनील वानखडे यांचे आवाहन

Sunil Wankhade : धार्मिक उत्सवांच्या माध्यमातून सामाजिक हित साधणारे विधायक उपक्रम राबवावेत. सर्वधर्मीयांनी सामाजिक सलोखा, ऐक्य आणि शांतता जोपासत जबाबदारीचे भान ठेवून पारंपरिक धार्मिक उत्सव साजरे करावेत, असे आवाहन बोरगाव मंजू पोलिस ठाण्याचे ठाणेदार सुनील वानखडे यांनी केले.

गणेश विसर्जन मिरवणुकीत लेझर लाईट टाळा; बोरगाव मंजू शांतता समितीच्या बैठकीत पोलिसांचा इशारा

बोरगाव मंजू : धार्मिक उत्सवांच्या माध्यमातून सामाजिक हित साधणारे विधायक उपक्रम राबवावेत. सर्वधर्मीयांनी सामाजिक सलोखा, ऐक्य आणि शांतता जोपासत जबाबदारीचे भान ठेवून पारंपरिक धार्मिक उत्सव साजरे करावेत, असे आवाहन बोरगाव मंजू पोलिस ठाण्याचे ठाणेदार सुनील वानखडे यांनी केले.

आगामी धार्मिक उत्सवांच्या पार्श्वभूमीवर बोरगाव मंजू पोलिस प्रशासनाच्या वतीने शांतता समितीच्या बैठकीचे आयोजन करण्यात आले होते. या बैठकीच्या अध्यक्षस्थानी ठाणेदार सुनील वानखडे होते. यावेळी पोलिस उपनिरीक्षक मनोज उघडे, पोलिस उपनिरीक्षक ज्ञानेश्वर लांडे, सार्वजनिक गणेशोत्सव मंडळांचे कार्यकर्ते आणि शांतता समितीचे सदस्य उपस्थित होते.

मिरवणुकांमध्ये लेझर लाईटचा वापर टाळण्याचे आवाहन

यावेळी ठाणेदार सुनील वानखडे यांनी धार्मिक उत्सव आणि मिरवणुकांदरम्यान घ्यावयाच्या खबरदारीबाबत मार्गदर्शन केले. सार्वजनिक गणेशोत्सव विसर्जन मिरवणुकीत मानवी आरोग्यास धोका निर्माण करणाऱ्या लेझर लाईटचा वापर टाळणे गरजेचे आहे. लेझर लाईटमुळे डोळ्यांना इजा होण्याची शक्यता असते. तसेच, कर्कश आवाज आणि मोठ्या आवाजातील वाद्यांमुळे आरोग्यावर विपरीत परिणाम होऊ शकतो. त्यामुळे उत्सव साजरा करताना आवश्यक ती दक्षता घ्यावी, असे आवाहन त्यांनी केले.

कायदा-सुव्यवस्था राखण्यासाठी पोलिसांना सहकार्य करा

पोलिस उपनिरीक्षक मनोज उघडे यांनी उत्सव काळात कायदा व सुव्यवस्था अबाधित राखण्यासाठी पोलिस प्रशासनाला सहकार्य करण्याचे आवाहन केले. तर पोलिस उपनिरीक्षक ज्ञानेश्वर लांडे यांनी धार्मिक उत्सवांच्या माध्यमातून सामाजिक सलोखा आणि ऐक्य निर्माण करण्यावर भर दिला.

बैठकीत उपस्थित शांतता समितीच्या सदस्यांनीही आपले विचार मांडत कायदा व सुव्यवस्था राखण्यासाठी पोलिस प्रशासनाला सहकार्य करण्याचे आश्वासन दिले.

बैठकीचे प्रास्ताविक पोलिस उपनिरीक्षक मनोज उघडे यांनी केले, तर संचालन संतोष चक्रनारायण यांनी केले.