Gram Panchayat : अंजनी बु. येथे ग्रामस्थांचा ग्रामपंचायतीवर ‘कचरा एल्गार’; दोन दिवसांचा अल्टिमेटम

Gram Panchayat : डोणगाव ग्रामपंचायतीच्या कथित दुर्लक्षामुळे अंजनी बु. येथे गेल्या अनेक दिवसांपासून कचऱ्याची विल्हेवाट लावण्याची व्यवस्था कोलमडली असल्याचा आरोप ग्रामस्थांनी केला आहे. गावात कचरा संकलनासाठी घंटागाडी उपलब्ध असतानाही ती नियमित सुरू केली जात नसल्याने संतप्त ग्रामस्थांनी सोमवार, १५ सप्टेंबर रोजी प्रशासनाविरोधात आक्रमक भूमिका घेतली. येत्या दोन दिवसांत कचरा गाडी पूर्ववत सुरू न केल्यास संपूर्ण गावातील कचरा गोळा करून थेट ग्रामपंचायत कार्यालयात टाकण्याचा इशारा ग्रामस्थांनी दिला आहे.

  घंटागाडी असूनही कचऱ्याचा प्रश्न कायम; अंजनी बु. ग्रामस्थांचा ग्रामपंचायतीला इशारा

डोणगाव : डोणगाव ग्रामपंचायतीच्या कथित दुर्लक्षामुळे अंजनी बु. येथे गेल्या अनेक दिवसांपासून कचऱ्याची विल्हेवाट लावण्याची व्यवस्था कोलमडली असल्याचा आरोप ग्रामस्थांनी केला आहे. गावात कचरा संकलनासाठी घंटागाडी उपलब्ध असतानाही ती नियमित सुरू केली जात नसल्याने संतप्त ग्रामस्थांनी सोमवार, १५ सप्टेंबर रोजी प्रशासनाविरोधात आक्रमक भूमिका घेतली. येत्या दोन दिवसांत कचरा गाडी पूर्ववत सुरू न केल्यास संपूर्ण गावातील कचरा गोळा करून थेट ग्रामपंचायत कार्यालयात टाकण्याचा इशारा ग्रामस्थांनी दिला आहे.

घंटागाडी असूनही कचरा संकलन ठप्प

अंजनी बु. गावात कचरा संकलनासाठी घंटागाडी उपलब्ध आहे. मात्र, ग्रामपंचायत प्रशासनाच्या नियोजनशून्य कारभारामुळे ही गाडी वर्षभरापासून जागेवरच उभी असल्याचा ग्रामस्थांचा आरोप आहे. नवीन घंटागाडी आणल्यापासून तिचा एकदाही वापर करण्यात आलेला नसल्याचेही ग्रामस्थांनी सांगितले.

कचरा संकलनाची नियमित व्यवस्था नसल्याने नागरिकांकडून रस्त्याच्या कडेला तसेच इतर ठिकाणी कचरा टाकला जात आहे. परिणामी गावातील विविध भागांत कचऱ्याचे ढीग साचले असून दुर्गंधीचे साम्राज्य निर्माण झाले आहे. डासांचा प्रादुर्भाव वाढल्याने नागरिकांच्या आरोग्याचा प्रश्न गंभीर बनला असून, आजारांचा फैलाव होण्याची भीती ग्रामस्थांनी व्यक्त केली आहे.

पाणीपुरवठ्याचाही प्रश्न गंभीर

गावात केवळ कचऱ्याचाच प्रश्न नसून पाणीपुरवठ्याची समस्याही गंभीर असल्याचे ग्रामस्थांचे म्हणणे आहे. अनेकदा दीड-दिड महिन्याच्या अंतराने नळाला पाणी येत असल्याचा आरोप त्यांनी केला आहे. गावात अशा अनेक मूलभूत सुविधांशी संबंधित समस्या निर्माण झाल्या असून, ग्रामपंचायत प्रशासन ग्रामस्थांच्या तक्रारींकडे लक्ष देत नसल्याचा संताप व्यक्त करण्यात आला.

नागरिक नियमितपणे कर भरत असतानाही मूलभूत सुविधांपासून वंचित राहावे लागत असल्याने ग्रामस्थांमध्ये तीव्र नाराजी निर्माण झाली आहे.

दोन दिवसांचा अल्टिमेटम

गावात कचरा गाडी उपलब्ध असूनही ती धूळ खात पडून आहे. याबाबत ग्रामपंचायत प्रशासनाला वारंवार माहिती देऊनही कोणतीही ठोस कार्यवाही होत नसल्याचा आरोप ग्रामस्थांनी केला आहे.

“येत्या दोन दिवसांत घंटागाडी नियमितपणे सुरू करून गावातील कचऱ्याची योग्य विल्हेवाट लावली नाही, तर संपूर्ण गावातील कचरा गोळा करून थेट ग्रामपंचायत कार्यालयात आणून टाकू,” असा सडेतोड इशारा संतप्त ग्रामस्थांनी दिला आहे.

ग्रामस्थांच्या या आक्रमक भूमिकेमुळे ग्रामपंचायत प्रशासनापुढे पेच निर्माण झाला आहे. आता दोन दिवसांच्या अल्टिमेटमनंतर प्रशासन कोणती भूमिका घेते, याकडे ग्रामस्थांसह परिसराचे लक्ष लागले आहे.