Milk :  डोणगावात दूध ८० रुपये लिटर; दुधाच्या गुणवत्तेवर प्रश्नचिन्ह, FDA तपासणीची ग्रामस्थांची मागणी

Milk : येथील काही स्थानिक दूध डेअरींमध्ये दुधाची चढ्या दराने विक्री होत असल्याचा आरोप ग्रामस्थांकडून करण्यात आला आहे. दुधाची किंमत तब्बल ८० रुपये प्रतिलिटर करण्यात आली असून, त्याचवेळी दुधात मोठ्या प्रमाणात पाणी मिसळले जात असल्याचा दावा नागरिकांनी केला आहे. त्यामुळे दुधाच्या गुणवत्तेसोबतच ग्राहकांच्या आरोग्याचा प्रश्न निर्माण झाला असून, अन्न व औषध प्रशासनाने (FDA) डोणगावातील दूध डेअरींची अचानक तपासणी करावी, अशी मागणी जोर धरू लागली आहे.

 दुधात पाण्याची भेसळ? डोणगावात ग्रामस्थ संतप्त; अन्न व औषध प्रशासनाकडे कारवाईची मागणी

डोणगाव : येथील काही स्थानिक दूध डेअरींमध्ये दुधाची चढ्या दराने विक्री होत असल्याचा आरोप ग्रामस्थांकडून करण्यात आला आहे. दुधाची किंमत तब्बल ८० रुपये प्रतिलिटर करण्यात आली असून, त्याचवेळी दुधात मोठ्या प्रमाणात पाणी मिसळले जात असल्याचा दावा नागरिकांनी केला आहे. त्यामुळे दुधाच्या गुणवत्तेसोबतच ग्राहकांच्या आरोग्याचा प्रश्न निर्माण झाला असून, अन्न व औषध प्रशासनाने (FDA) डोणगावातील दूध डेअरींची अचानक तपासणी करावी, अशी मागणी जोर धरू लागली आहे.

ग्रामस्थांनी दिलेल्या माहितीनुसार, गेल्या काही दिवसांपासून डोणगाव व परिसरातील काही दूध डेअरींमध्ये दुधाचे दर अचानक वाढवून ८० रुपये प्रतिलिटर करण्यात आले आहेत. दरवाढीमुळे सर्वसामान्य ग्राहकांच्या खिशावर अतिरिक्त भार पडत असतानाच, मिळणाऱ्या दुधाच्या गुणवत्तेबाबतही नागरिकांकडून प्रश्न उपस्थित केले जात आहेत.

दुधाच्या गुणवत्तेची तपासणी करण्याची मागणी

दुधात पाण्याचे प्रमाण अधिक असल्याचा आरोप नागरिकांकडून करण्यात येत असून, विशेषतः लहान मुले, वृद्ध आणि रुग्णांच्या आरोग्याच्या दृष्टीने दुधाची गुणवत्ता तपासणे आवश्यक असल्याचे ग्रामस्थांचे म्हणणे आहे.

काही दूध विक्रेत्यांकडून अधिक नफा मिळविण्यासाठी दुधाची गुणवत्ता कमी केली जात असल्याचा आरोपही करण्यात येत आहे. मात्र, या आरोपांची अधिकृत खातरजमा करण्यासाठी संबंधित विभागाकडून दूध नमुने घेऊन त्यांची प्रयोगशाळेत तपासणी होणे आवश्यक आहे.

अचानक तपासणीची मागणी

दुधाची विक्री करणाऱ्या डेअरींमध्ये दुधाची गुणवत्ता, भेसळ आणि दर याबाबत संबंधित यंत्रणेने तपासणी करावी, अशी मागणी ग्रामस्थांनी केली आहे. अन्न व औषध प्रशासनाने डोणगावात अचानक तपासणी मोहीम राबवून दूध नमुने तपासावेत आणि दोष आढळल्यास संबंधितांवर नियमानुसार कारवाई करावी, अशी अपेक्षा नागरिकांकडून व्यक्त होत आहे.

दरम्यान, चढ्या दराने दूधविक्री आणि दुधाच्या गुणवत्तेबाबत करण्यात येणाऱ्या आरोपांची अन्न व औषध प्रशासनाकडून तपासणी होणार का, याकडे डोणगाव परिसरातील नागरिकांचे लक्ष लागले आहे.