Tractor driver dies : वाकळवाडी मार्गावर सुरू असलेल्या सिमेंट काँक्रिटीकरणाच्या कामादरम्यान विजेच्या धक्क्याने ट्रॅक्टर चालकाचा जागीच मृत्यू झाल्याची दुर्दैवी घटना २० फेब्रुवारी रोजी घडली.
मेडशी : वाकळवाडी मार्गावर सुरू असलेल्या सिमेंट काँक्रिटीकरणाच्या कामादरम्यान विजेच्या धक्क्याने ट्रॅक्टर चालकाचा जागीच मृत्यू झाल्याची दुर्दैवी घटना २० फेब्रुवारी रोजी घडली.
अकोला–नांदेड रोडवरील वाकळवाडी बायपासखाली रस्त्याच्या डाव्या बाजूच्या शेतात महाराष्ट्र राज्य वीज वितरण कंपनी मर्यादित (महावितरण) यांच्या हायव्होल्टेज तारा अत्यंत धोकादायकरीत्या लोंबकळत होत्या. या जिवंत विद्युत तारांचा स्पर्श झाल्याने ट्रॅक्टर चालक गजानन नथुजी बोरकर (वय ५०, रा. पांगरी नवघरे) यांचा जागीच मृत्यू झाला.
रस्त्याची दुरवस्था झाल्याने काही अंतराचे सिमेंटीकरण युद्धपातळीवर सुरू असून या कामासाठी ट्रॅक्टर टँकरद्वारे नियमित पाणीपुरवठा केला जात होता. प्रत्यक्षदर्शींनी सांगितले की, या परिसरात अनेक वर्षांपासून विजेच्या तारा जमिनीजवळ लटकत होत्या; मात्र त्याकडे संबंधित यंत्रणेचे दुर्लक्ष झाले होते. या तारांमधून उच्च दाबाचा विद्युत प्रवाह सुरू असल्याने संपर्कात येताच चालकाचा मृत्यू झाला.
घटनेनंतर परिसरात संतापाची लाट उसळली असून लोंबकळणाऱ्या विजेच्या तारांबाबत महावितरणने तातडीने उपाययोजना करून त्या सुरक्षित उंचीवर हलवाव्यात, अशी मागणी नागरिकांकडून होत आहे. प्रशासन व वीज वितरण कंपनीने वेळीच पावले उचलली नाहीत, तर भविष्यात अशा दुर्घटना पुन्हा घडण्याची भीती व्यक्त केली जात आहे.घटनेची माहिती मिळताच मेडशी पोलिसांनी घटनास्थळी धाव घेऊन पंचनामा केला असून पुढील तपास सुरू आहे.
जिल्ह्यातील बातम्यासाठी वाशिम पेजला भेट द्या
