The auto-rickshaw overturned : दुचाकीला वाचवण्याच्या प्रयत्नात ऑटो चालकाने अचानक ब्रेक लावले. त्यामुळे, ऑटो उलटून झालेल्या अपघातात वृद्ध महिलेचा जागीच मृत्यू झाला तर पाच प्रवासी गंभीर जखमी झाले. ही घटना बाळापूर–वाडेगाव मार्गावर मांडवा फाट्याजवळ मंगळवार ६ जानेवारी रोजी सकाळी सुमारे ११.३० वाजता घडली.
बाळापूर–वाडेगाव मार्गावर भीषण अपघात: पाच प्रवासी गंभीर जखमी
राहुल सोनोने
वाडेगाव : दुचाकीला वाचवण्याच्या प्रयत्नात ऑटो चालकाने अचानक ब्रेक लावले. त्यामुळे, ऑटो उलटून झालेल्या अपघातात वृद्ध महिलेचा जागीच मृत्यू झाला तर पाच प्रवासी गंभीर जखमी झाले. ही घटना बाळापूर–वाडेगाव मार्गावर मांडवा फाट्याजवळ मंगळवार ६ जानेवारी रोजी सकाळी सुमारे ११.३० वाजता घडली.
मिळालेल्या माहितीनुसार, मांडवा फाट्याजवळील लक्ष्मीकांत पेट्रोल पंपावरून पेट्रोल भरून निघालेल्या एका दुचाकी चालकाची दुचाकी अचानक स्लीप झाली. त्याच वेळी वाडेगावकडून येणाऱ्या ऑटोचालकाने दुचाकीला वाचविण्याच्या प्रयत्नात अचानक ब्रेक दाबले, मात्र नियंत्रण सुटल्याने ऑटो रस्त्यावरच उलटला.
या अपघातात ऑटोमधील प्रवासी असलेल्या पंचफुला परमेश्वर वाघ (वय ६७, रा. वाडेगाव) या वृद्ध महिलेवर ऑटो कोसळल्याने त्यांचा जागीच मृत्यू झाला. तसेच ऑटोमधील इतर पाच प्रवासी गंभीर जखमी झाले.
अपघाताची माहिती मिळताच बाळापूर पोलीस स्टेशनचे ठाणेदार प्रकाश झोडगे यांच्यासह पोलीस कॉन्स्टेबल मो. रफीक शेख, सलीम पठाण व प्रताप राठोड यांनी तत्काळ घटनास्थळी धाव घेतली. जखमींना तातडीने बाळापूर येथील ग्रामीण रुग्णालयात दाखल करण्यात आले. दरम्यान, या अपघातामुळे काही काळ वाहतुकीस अडथळा निर्माण झाला होता. घटनेची नोंद घेण्यात आली असून पुढील तपास बाळापूर पोलीस करीत आहेत.
