Sanjay Kute : जळगाव–जामोद येथे आयोजित तेली समाजाचा राज्यस्तरीय भव्य वधू–वर व पालक परिचय मेळावा अत्यंत उत्साहपूर्ण आणि सकारात्मक वातावरणात पार पडला. या मेळाव्यात समाजातील युवक-युवती, पालक तसेच मान्यवरांची मोठ्या संख्येने उपस्थिती लाभली.
जळगाव–जामोद येथे तेली समाजाचा राज्यस्तरीय भव्य वधू–वर व पालक परिचय मेळावा उत्साहात
साखरखेर्डा : जळगाव–जामोद येथे आयोजित तेली समाजाचा राज्यस्तरीय भव्य वधू–वर व पालक परिचय मेळावा अत्यंत उत्साहपूर्ण आणि सकारात्मक वातावरणात पार पडला. या मेळाव्यात समाजातील युवक-युवती, पालक तसेच मान्यवरांची मोठ्या संख्येने उपस्थिती लाभली.
उद्घाटनप्रसंगी बोलताना माजीमंत्री तथा आमदार डॉ. संजय कुटे यांनी सांगितले की, उपेक्षित व वंचित समाजासाठी मदत करणे हे आपले कर्तव्य आहे. शेगाव येथे माळी समाजासाठी दोन समाजभवन, तेली समाजासाठी स्वतंत्र भवन तसेच जळगाव–जामोद येथे नाभिक समाजासाठी भव्य समाजभवन उपलब्ध करून देण्यात आल्याचे त्यांनी नमूद केले. आजच्या काळात सामूहिक विवाह सोहळे आणि वधू–वर परिचय मेळावे अत्यंत आवश्यक असून, अशा उपक्रमांतून समाजातील नातेसंबंध दृढ होतात. जळगाव–जामोद येथील तेली समाज दरवर्षी हा उपक्रम सातत्याने राबवत असल्याचे कौतुकही त्यांनी केले.
वधू–वर परिचय मेळाव्यांतून नात्याची वीण घट्ट होते – माजी खासदार रामदास तडस
यावेळी मार्गदर्शन करताना माजी खासदार तथा महाराष्ट्र प्रांतिक तैलिक महासभेचे प्रदेशाध्यक्ष रामदास तडस म्हणाले की, आज बुलढाणा जिल्हा व नांदेड येथे एकाच वेळी वधू–वर परिचय मेळावे आयोजित करण्यात आले आहेत. वधूला योग्य वर आणि वराला योग्य वधू मिळावी, तसेच नात्यांची वीण घट्ट व्हावी, यासाठी असे मेळावे महत्त्वाची भूमिका बजावतात. जळगाव–जामोद येथे तेली समाजाचे स्वतंत्र समाजभवन उभारावे, अशी अपेक्षाही त्यांनी व्यक्त केली.
या मेळाव्यात विशेष अतिथी म्हणून उपस्थित मान्यवरांनी समाज संघटन, शिक्षण, युवक-युवतींचे भविष्य, सामाजिक एकोपा व प्रगतीसाठी सामूहिक प्रयत्नांची आवश्यकता यावर आपले विचार मांडले. अशा उपक्रमांमुळे केवळ वैवाहिक नातेसंबंधच नव्हे तर समाजाची एकजूट अधिक बळकट होते, असा विश्वास यावेळी व्यक्त करण्यात आला.
या प्रसंगी माजीमंत्री तथा आमदार डॉ. संजय कुटे यांच्या हस्ते वधू–वर परिचय मेळाव्याचे उद्घाटन करण्यात आले. यावेळी माजी खासदार रामदास तडस, भाजप खामगाव जिल्हाध्यक्ष सचिन देशमुख, रमेश अकोटकार, संदीप चौधरी, महाराष्ट्र प्रांतिक तैलिक महासभेचे जिल्हाध्यक्ष सुभाष देव्हडे, रामदास देव्हडे, नगरसेविका विमलताई देव्हडे, संजय चोपडे, गणेश अरुडकार, संजय पांडव, प्रफुल कावरे, गणेश जामोदे, तसेच प्रांतिक तैलिक महासभेचे प्रसिद्धी प्रमुख अशोक इंगळे, कार्याध्यक्ष ज्ञानदेव क्षिरसागर यांच्यासह समाजातील मान्यवर पदाधिकारी व समाजबांधव मोठ्या संख्येने उपस्थित होते.
