dopamine trap: भारतीय स्वातंत्र्यदिनाच्या औचित्याने जिल्हा परिषद उच्च प्राथमिक शाळा, मेहुणा राजा येथे विशेष कार्यक्रमाचे आयोजन करण्यात आले. विद्यार्थ्यांमध्ये वाढत चाललेल्या मोबाईलच्या व्यसनावर मात करण्यासाठी या कार्यक्रमातून प्रभावी प्रबोधन करण्यात आले. यावेळी गरजू विद्यार्थ्यांना मोफत वह्यांसह शैक्षणिक साहित्याचे वाटप करण्यात आले.
रील्स-गेमिंगच्या व्यसनाला द्या लगाम; फुके सरांचा विद्यार्थ्यांना मैदानी खेळांचा मंत्र
गजानन तिडके
देऊळगाव राजा : भारतीय स्वातंत्र्यदिनाच्या औचित्याने जिल्हा परिषद उच्च प्राथमिक शाळा, मेहुणा राजा येथे विशेष कार्यक्रमाचे आयोजन करण्यात आले. विद्यार्थ्यांमध्ये वाढत चाललेल्या मोबाईलच्या व्यसनावर मात करण्यासाठी या कार्यक्रमातून प्रभावी प्रबोधन करण्यात आले. यावेळी गरजू विद्यार्थ्यांना मोफत वह्यांसह शैक्षणिक साहित्याचे वाटप करण्यात आले.
‘डोपामाइन ट्रॅप’पासून विद्यार्थ्यांनी सावध राहावे
कार्यक्रमात प्रमुख मार्गदर्शक म्हणून आय.सी.आय. (ICI) कोचिंग क्लासेसचे संचालक फुके सर यांनी विद्यार्थ्यांना मार्गदर्शन केले. सध्याच्या डिजिटल युगात विद्यार्थी मोबाईल आणि सोशल मीडियाच्या ‘डोपामाइन ट्रॅप’मध्ये कसे अडकत चालले आहेत, याविषयी त्यांनी सविस्तर माहिती दिली.
मोबाईलवरील रील्स, गेमिंग आणि सतत येणाऱ्या नोटिफिकेशन्समुळे मेंदूमध्ये क्षणिक आनंदाची भावना निर्माण करणारे डोपामाइन रसायन सक्रिय होते. त्यामुळे विद्यार्थ्यांना मोबाईलचा अधिकाधिक वापर करण्याची सवय लागते आणि त्याचा थेट परिणाम अभ्यासातील एकाग्रतेवर होतो, हे फुके सरांनी विद्यार्थ्यांना अत्यंत सोप्या भाषेत समजावून सांगितले. या मानसिक जाळ्यातून बाहेर पडण्यासाठी मोबाईलचा अनावश्यक वापर टाळावा, मैदानी खेळांना वेळ द्यावा आणि अभ्यासावर लक्ष केंद्रित करावे, असे आवाहन त्यांनी केले.
गरजू विद्यार्थ्यांना शैक्षणिक साहित्याचे वाटप
या सामाजिक उपक्रमांतर्गत शाळेतील गरजू विद्यार्थ्यांना मोफत वह्यांचे वाटप करण्यात आले. शैक्षणिक साहित्याची मदत मिळाल्याने विद्यार्थ्यांमध्ये उत्साहाचे वातावरण निर्माण झाले. विद्यार्थ्यांच्या शैक्षणिक प्रगतीला हातभार लावणारा हा उपक्रम कौतुकास्पद ठरला.
कार्यक्रमास शाळेचे मुख्याध्यापक, शिक्षकवृंद, शालेय व्यवस्थापन समितीचे पदाधिकारी, ग्रामस्थ आणि विद्यार्थी मोठ्या संख्येने उपस्थित होते. मार्गदर्शनपर आणि सामाजिक उपक्रमासाठी शाळा प्रशासनाने फुके सर व आय.सी.आय. क्लासेसचे मनःपूर्वक आभार मानले.
