Sadanand Sawant: 19 वर्षांच्या देशसेवेनंतर सदानंद सावंत यांचे पातूरमध्ये जल्लोषात स्वागत; भव्य मिरवणुकीतून सन्मान

Sadanand Sawant: भारतीय सैन्यात तब्बल 19 वर्षे देशसेवा बजावल्यानंतर सेवानिवृत्त झालेल्या पातूर येथील भूमिपुत्र सदानंद सावंत यांचा शहरवासीयांनी उत्साहात आणि अभिमानाने गौरव केला. देशभक्तीपर गीतांच्या गजरात, डीजेच्या तालावर आणि युवकांच्या उत्स्फूर्त सहभागातून पातूर शहरातून त्यांची भव्य मिरवणूक काढण्यात आली. यानंतर त्यांचा सत्कार समारंभही आयोजित करण्यात आला.

  सेवानिवृत्त जवानाला पातूरकरांचा सलाम; देशभक्तीपर गीतांच्या गजरात काढली मिरवणूक

पातूर : भारतीय सैन्यात तब्बल 19 वर्षे देशसेवा बजावल्यानंतर सेवानिवृत्त झालेल्या पातूर येथील भूमिपुत्र सदानंद सावंत यांचा शहरवासीयांनी उत्साहात आणि अभिमानाने गौरव केला. देशभक्तीपर गीतांच्या गजरात, डीजेच्या तालावर आणि युवकांच्या उत्स्फूर्त सहभागातून पातूर शहरातून त्यांची भव्य मिरवणूक काढण्यात आली. यानंतर त्यांचा सत्कार समारंभही आयोजित करण्यात आला.

सदानंद सावंत हे भारतीय सैन्यातील मराठा बटालियनमध्ये कार्यरत होते. प्रतिकूल आणि हलाखीच्या परिस्थितीत शिक्षण पूर्ण करून त्यांनी देशसेवेचे स्वप्न साकार केले. सन 2007 मध्ये नाशिक येथे मराठा बटालियनमध्ये त्यांची भरती झाली. त्यानंतर जवळपास दोन दशके त्यांनी विविध संवेदनशील आणि महत्त्वाच्या ठिकाणी सेवा बजावत देशरक्षणाची जबाबदारी समर्थपणे पार पाडली.

सेवेच्या कालावधीत त्यांनी उरी सेक्टर, जम्मू-काश्मीर; रायवाला, उत्तराखंड; काँगो, दक्षिण आफ्रिका; श्रीनगर येथील 7 राष्ट्रीय रायफल; राजोरी, जम्मू-काश्मीर; छत्रपती संभाजीनगर, महाराष्ट्र; सिक्कीम; तसेच प्रयागराज, उत्तर प्रदेश अशा विविध ठिकाणी कार्य केले. सीमावर्ती भागांपासून ते परदेशातील नियुक्त्यांपर्यंत त्यांनी कर्तव्यदक्षतेने सेवा बजावून आपल्या गावाचे आणि जिल्ह्याचे नाव उज्ज्वल केले. 1 जुलै 2026 रोजी लातूर, महाराष्ट्र येथून ते सेवानिवृत्त झाले.

त्यांच्या सन्मानार्थ आज पातूर शहरात भव्य मिरवणुकीचे आयोजन करण्यात आले होते. या मिरवणुकीला पोलीस स्टेशन चौक येथून प्रारंभ झाला. त्यानंतर डॉ. आंबेडकर चौक येथील हुतात्मा स्मारकाला मानवंदना देण्यात आली. पुढे मिलिंद नगर येथील बौद्ध विहारात डॉ. बाबासाहेब आंबेडकर यांच्या पुतळ्याला हार अर्पण करून अभिवादन करण्यात आले. तसेच शहीद आनंद काळपांडे स्मारकाला सलामी देण्यात आली.

मिरवणूक पुढे महात्मा फुले उद्यान आणि संभाजी चौक मार्गे नेण्यात आली. येथे महात्मा जोतिबा फुले यांच्या पुतळ्यास हार अर्पण करून अभिवादन करण्यात आले. शहरातील विविध प्रमुख मार्गांवरून मिरवणूक काढल्यानंतर सिदाजी महाराज मंगल कार्यालय येथे तिचा समारोप झाला. यानंतर आयोजित सत्कार समारंभात सदानंद सावंत यांचा गौरव करण्यात आला.

या कार्यक्रमाला पातूर तालुका माजी सैनिक संघटना, शहरातील महिला-पुरुष, युवक तसेच नागरिकांची लक्षणीय उपस्थिती होती. मिरवणूक आणि सत्कार समारंभ यशस्वी करण्यासाठी पातूरच्या सदानंद सावंत मित्रपरिवारातील सदस्यांनी विशेष परिश्रम घेतले.

गावातील एका भूमिपुत्राने प्रतिकूल परिस्थितीतून पुढे येत भारतीय सैन्यात 19 वर्षे सेवा बजावल्याबद्दल पातूरकरांनी व्यक्त केलेला हा सन्मान शहरासाठी अभिमानाचा क्षण ठरला. देशसेवा पूर्ण करून गावात परतलेल्या जवानाला नागरिकांनी दिलेला हा गौरव म्हणजे राष्ट्रसेवेप्रती कृतज्ञतेची भावपूर्ण सलामी असल्याची भावना यावेळी व्यक्त करण्यात आली.