Umer Malik : महाराष्ट्र राज्य माध्यमिक व उच्च माध्यमिक शिक्षण मंडळ, पुणे यांच्या वतीने घेण्यात आलेल्या बारावीच्या परीक्षेत बाळापूर शहरातील मोहम्मद उमेर मलिक या होतकरू विद्यार्थ्याने आपल्या उल्लेखनीय यशाने संपूर्ण शहराचा मान उंचावला आहे. इयत्ता बारावी (HSC) परीक्षेच्या निकालात उमेरने 92.83 टक्के गुण (557/600) मिळवत नेत्रदीपक कामगिरी केली आहे.
गणितात शतप्रतिशत; शिक्षकाच्या सुपुत्राची दमदार झेप
जाकीर अहमद
बाळापूर : महाराष्ट्र राज्य माध्यमिक व उच्च माध्यमिक शिक्षण मंडळ, पुणे यांच्या वतीने घेण्यात आलेल्या बारावीच्या परीक्षेत बाळापूर शहरातील मोहम्मद उमेर मलिक या होतकरू विद्यार्थ्याने आपल्या उल्लेखनीय यशाने संपूर्ण शहराचा मान उंचावला आहे. इयत्ता बारावी (HSC) परीक्षेच्या निकालात उमेरने 92.83 टक्के गुण (557/600) मिळवत नेत्रदीपक कामगिरी केली आहे.
साध्या कुटुंबातील आणि कर्तृत्ववान शिक्षक मोहम्मद आसिफ यांचा सुपुत्र असलेल्या उमेरने मर्यादित साधनसंपत्तीवर मात करत जिद्द, मेहनत आणि योग्य मार्गदर्शनाच्या जोरावर मोठे यश मिळवता येते, हे सिद्ध करून दाखवले आहे. त्याच्या या यशामुळे केवळ कुटुंबच नव्हे, तर संपूर्ण बाळापूर शहरात आनंद आणि अभिमानाचे वातावरण निर्माण झाले आहे.
उमेरने प्रत्येक विषयात उत्कृष्ट गुण मिळवत आपल्या सर्वांगीण गुणवत्तेचा ठसा उमटवला आहे. इंग्रजी विषयात 84, हिंदीत 91, भौतिकशास्त्रात 93, रसायनशास्त्रात 92 आणि जीवशास्त्रात 97 गुण मिळवत त्याने संतुलित यश संपादन केले. मात्र, गणित व सांख्यिकी विषयात मिळवलेले शंभर टक्के गुण हे त्याच्या बुद्धिमत्तेचे आणि कठोर परिश्रमाचे ठळक उदाहरण ठरले आहे. त्याच्या या यशाचे श्रेय तो आपल्या सातत्यपूर्ण अभ्यासाला, वेळेच्या शिस्तबद्ध नियोजनाला आणि वडिलांच्या मार्गदर्शनाला देतो. “प्रामाणिक मेहनत आणि सातत्य कधीही वाया जात नाही,” असे त्याचे वडील आणि शिक्षक मोहम्मद आसिफ यांनी सांगताना अभिमान व्यक्त केला. उमेरच्या या यशामुळे स्थानिक नागरिक, शिक्षक आणि विद्यार्थी यांच्यात उत्साहाचे वातावरण निर्माण झाले आहे. अनेकांनी त्याच्या कामगिरीचे “बाळापूरचा मोठा धमाका” असे वर्णन करत त्याच्यावर अभिनंदनाचा वर्षाव केला आहे. मोहम्मद उमेर मलिकच्या या यशाने शहरातील विद्यार्थ्यांना नवी प्रेरणा मिळाली असून, जिद्द आणि मेहनतीच्या बळावर कोणतेही स्वप्न साकार करता येते, हा संदेश त्याने दिला आहे. हे यश केवळ एका विद्यार्थ्याचे नसून, संपूर्ण परिसराच्या आत्मविश्वासाचा आणि उज्ज्वल भविष्यासाठीच्या आशेचा विजय ठरत आहे.
