TET-CTET Teachers : जिल्ह्यातील टीईटी व सीटीईटी उत्तीर्ण शिक्षकांसाठी पदोन्नतीचा मार्ग मोकळा करण्याच्या दृष्टीने महत्त्वपूर्ण पाऊल उचलण्यात आले आहे. सर्वोच्च न्यायालय तसेच महाराष्ट्र शासनाच्या शालेय शिक्षण विभागाच्या आदेशानुसार जिल्हा परिषदेकडून टीईटी/सीटीईटी पात्र शिक्षकांची तात्पुरती (अंतरिम) ज्येष्ठता यादी प्रसिद्ध करण्यात आली आहे. या प्रक्रियेमुळे शिक्षकांमध्ये उत्सुकता वाढली असून, आगामी पदोन्नती प्रक्रियेची दिशा स्पष्ट होऊ लागली आहे.
टीईटी शिक्षकांची अंतरिम ज्येष्ठता यादी जाहीर; ज्येष्ठता यादीतील त्रुटींवर अंतिम संधी
बुलढाणा : जिल्ह्यातील टीईटी व सीटीईटी उत्तीर्ण शिक्षकांसाठी पदोन्नतीचा मार्ग मोकळा करण्याच्या दृष्टीने महत्त्वपूर्ण पाऊल उचलण्यात आले आहे. सर्वोच्च न्यायालय तसेच महाराष्ट्र शासनाच्या शालेय शिक्षण विभागाच्या आदेशानुसार जिल्हा परिषदेकडून टीईटी/सीटीईटी पात्र शिक्षकांची तात्पुरती (अंतरिम) ज्येष्ठता यादी प्रसिद्ध करण्यात आली आहे. या प्रक्रियेमुळे शिक्षकांमध्ये उत्सुकता वाढली असून, आगामी पदोन्नती प्रक्रियेची दिशा स्पष्ट होऊ लागली आहे.
मुख्य कार्यकारी अधिकारी गुलाबराव खरात यांच्या २४ मार्च २०२६ रोजीच्या आदेशानुसार ही यादी अंतरिम स्वरूपात जाहीर करण्यात आली. २५ मार्चपासून ही यादी जिल्ह्यातील सर्व पंचायत समित्या, गटसाधन केंद्रांच्या नोटीस बोर्डावर तसेच शिक्षकांच्या विविध व्हॉट्सॲप गटांवर उपलब्ध करून देण्यात आली आहे. त्यामुळे प्रत्येक शिक्षकाला आपली माहिती तपासण्याची संधी मिळाली आहे.
दरम्यान, या यादीतील त्रुटी दूर करण्यासाठी प्रशासनाने पुढाकार घेत २७ मार्च २०२६ रोजी विशेष कार्यशाळेचे आयोजन केले आहे. ही कार्यशाळा सकाळी ११ वाजता श्री छत्रपती शिवाजी महाराज सभागृह येथे होणार आहे. या कार्यशाळेत शिक्षकांना त्यांच्या नोंदीतील चुका दुरुस्त करण्याची, आक्षेप नोंदविण्याची तसेच नाव समाविष्ट करण्याची अंतिम संधी उपलब्ध करून देण्यात आली आहे.
प्राथमिक शिक्षणाधिकारी विकास पाटील यांनी दिलेल्या माहितीनुसार, ज्या शिक्षकांनी अद्याप अर्ज सादर केलेले नाहीत, त्यांनी आवश्यक कागदपत्रांसह आणि लेखी अर्जासह कार्यशाळेला उपस्थित राहणे बंधनकारक आहे. तसेच सर्व गटशिक्षणाधिकाऱ्यांना किंवा त्यांच्या प्रतिनिधींना उपस्थित राहून दुरुस्तीची प्रक्रिया पूर्ण करण्याचे निर्देश देण्यात आले आहेत. या कार्यशाळेनंतर अंतिम ज्येष्ठता यादी प्रसिद्ध केली जाणार असून, त्यानंतर कोणत्याही प्रकारचे आक्षेप ग्राह्य धरले जाणार नाहीत, असे प्रशासनाने स्पष्ट केले आहे. त्यामुळे शिक्षकांनी ही संधी गमावू नये, असे आवाहनही करण्यात आले आहे. एकूणच, या प्रक्रियेमुळे जिल्ह्यातील शिक्षकांच्या पदोन्नतीसाठी पारदर्शक आणि सुटसुटीत व्यवस्था उभी राहण्याची अपेक्षा व्यक्त केली जात आहे. आता सर्वांचे लक्ष २७ मार्चच्या कार्यशाळेकडे लागले असून, त्यानंतर अंतिम यादी जाहीर होताच शिक्षकांच्या सेवाश्रेयसाबाबतचे चित्र स्पष्ट होणार आहे.
