Achal Wankhade: सिद्धार्थ विहार माध्यमिक व उच्च माध्यमिक विद्यालय, पास्टूल येथील विद्यार्थिनी आचल वानखडे हिने आपल्या दमदार खेळाच्या बळावर विभागस्तरीय शालेय बॉक्सिंग स्पर्धेत सुवर्णपदक पटकावत अकोल्याचे नाव उज्ज्वल केले आहे.

पातूर : सिद्धार्थ विहार माध्यमिक व उच्च माध्यमिक विद्यालय, पास्टूल येथील विद्यार्थिनी आचल वानखडे हिने आपल्या दमदार खेळाच्या बळावर विभागस्तरीय शालेय बॉक्सिंग स्पर्धेत सुवर्णपदक पटकावत अकोल्याचे नाव उज्ज्वल केले आहे.
अलीकडेच अकोला येथे झालेल्या विभागीय स्पर्धेत आचलने आपल्या वजनगटातील सर्व लढती जिंकत अंतिम फेरीत प्रवेश मिळवला आणि प्रतिस्पर्ध्याला पराभूत करत विजेतेपदावर आपला ठसा उमटवला. तिच्या जोशपूर्ण पंचेस, आत्मविश्वासपूर्ण खेळ आणि उत्कृष्ट तंत्रामुळे प्रेक्षकांनीही तिच्या कामगिरीचे मनःपूर्वक कौतुक केले.
आचलचे प्रशिक्षक अमोल उमाळे यांनी सांगितले की, “आचल ही अतिशय मेहनती व शिस्तप्रिय खेळाडू आहे. नियमित सराव, योग्य आहार आणि सकारात्मक दृष्टिकोन या जोरावर तिने हे यश मिळवले.”
या यशाबद्दल संस्थेचे सचिव प्रा. शैलेश इंगळे, कनिष्ठ महाविद्यालयाचे प्राचार्य एस. बी. वानखडे, क्रीडा शिक्षक प्रा. विनय खंडारे यांच्यासह सर्व प्राध्यापक व शिक्षकेतर कर्मचारी यांनी तिचे अभिनंदन केले व पुढील स्पर्धेसाठी शुभेच्छा दिल्या. आचल वानखडेच्या या उल्लेखनीय यशामुळे जिल्ह्यात सर्वत्र तिचे कौतुक होत असून, आगामी राज्यस्तरीय स्पर्धेसाठी शुभेच्छांचा वर्षाव होत आहे.

