Mukul Wasnik :दुसऱ्यांचे आमदार-खासदार फोडणाऱ्या भाजपला आता स्वतःचे लोक साबूत ठेवावे लागतील!” — मुकुल वासनिक

Mukul Wasnik : राज्यातील दुष्काळसदृश परिस्थितीमुळे खरीप पिकांचे मोठ्या प्रमाणावर नुकसान झाले असताना शेतकऱ्यांना अद्याप मदतीची प्रतीक्षा आहे. या पार्श्वभूमीवर काँग्रेसचे महासचिव तथा खासदार मुकुल वासनिक यांनी बुलढाणा जिल्ह्यातील मेहकर तालुक्यातील नायगाव-दत्तापूर शिवारात दुष्काळग्रस्त शेतकऱ्यांच्या बांधावर जाऊन नुकसानग्रस्त खरीप पिकांची पाहणी केली. शेतकऱ्यांसोबत ठेचा-भाकरी आणि बेसनाचा आस्वाद घेत त्यांनी शेतकऱ्यांच्या अडचणी व व्यथा जाणून घेतल्या.

  दिवाळीपूर्वी शेतकऱ्यांना मदत द्या, अन्यथा काँग्रेसचे आंदोलन! मुकुल वासनिकांचा सरकारला इशारा

विष्णू वाकळे

हिवराखुर्द : राज्यातील दुष्काळसदृश परिस्थितीमुळे खरीप पिकांचे मोठ्या प्रमाणावर नुकसान झाले असताना शेतकऱ्यांना अद्याप मदतीची प्रतीक्षा आहे. या पार्श्वभूमीवर काँग्रेसचे महासचिव तथा खासदार मुकुल वासनिक यांनी बुलढाणा जिल्ह्यातील मेहकर तालुक्यातील नायगाव-दत्तापूर शिवारात दुष्काळग्रस्त शेतकऱ्यांच्या बांधावर जाऊन नुकसानग्रस्त खरीप पिकांची पाहणी केली. शेतकऱ्यांसोबत ठेचा-भाकरी आणि बेसनाचा आस्वाद घेत त्यांनी शेतकऱ्यांच्या अडचणी व व्यथा जाणून घेतल्या. दिवाळीपूर्वी नुकसानग्रस्त शेतकऱ्यांना मदत मिळाली नाही, तर काँग्रेसच्या वतीने मोठे आंदोलन उभारण्यात येईल, असा इशारा वासनिक यांनी दिला. यावेळी त्यांनी भाजपवरही जोरदार राजकीय निशाणा साधला.

धरणाशेजारी शेती, तरी सोयाबीनचे पीक उद्ध्वस्त!

यंदा पावसातील खंड आणि प्रतिकूल हवामानामुळे खरीप पिकांचे मोठे नुकसान झाले आहे. नायगाव-दत्तापूर शिवारातील शेतकऱ्यांच्या शेतावर प्रत्यक्ष भेट देऊन मुकुल वासनिक यांनी परिस्थितीची पाहणी केली. यावेळी शेतकऱ्यांनी त्यांच्यासमोर आपल्या व्यथा मांडल्या.

धरणाच्या शेजारी शेती असूनही सोयाबीनचे पीक पूर्णपणे वाया गेल्याची व्यथा शेतकऱ्यांनी व्यक्त केली. धरणात पाणी उपलब्ध असतानाही महावितरणच्या ढिसाळ कारभारामुळे शेताला पाणी देता आले नाही, अशी तक्रारही त्यांनी केली. निसर्गाच्या लहरीपणासोबतच वीजपुरवठ्यातील अडचणींमुळेही पिकांचे नुकसान झाल्याचे शेतकऱ्यांनी वासनिक यांच्या निदर्शनास आणून दिले.

शेतकऱ्यांच्या बांधावर बसून ठेचा-भाकरी आणि बेसन खात वासनिक यांनी त्यांच्याशी संवाद साधला. केवळ कागदोपत्री माहिती न घेता प्रत्यक्ष शेतात जाऊन पिकांची अवस्था आणि शेतकऱ्यांच्या समस्या समजून घेण्याचा प्रयत्न या दौऱ्यातून करण्यात आला.

दिवाळीपूर्वी मदत द्या, अन्यथा आंदोलन!

राज्यात दुष्काळसदृश परिस्थिती निर्माण झाली असताना नुकसानग्रस्त शेतकऱ्यांना अद्याप आर्थिक मदतीची प्रतीक्षा करावी लागत आहे. सणासुदीच्या काळातही शेतकरी आर्थिक संकटाचा सामना करीत आहेत. त्यामुळे सरकारने दिवाळीपूर्वी नुकसानग्रस्त शेतकऱ्यांना मदत द्यावी; अन्यथा काँग्रेसच्या वतीने तीव्र आंदोलन छेडण्यात येईल, असा इशारा खासदार मुकुल वासनिक यांनी दिला.

शेतकऱ्यांचे नुकसान, वीजपुरवठ्याच्या समस्या आणि मदतीसाठी सुरू असलेली प्रतीक्षा या प्रश्नांकडे सरकारने गांभीर्याने लक्ष देण्याची गरज असल्याचे या दौऱ्याच्या निमित्ताने अधोरेखित झाले.

भाजपला आता स्वतःचे आमदार-खासदार सांभाळावे लागतील!

शेतकऱ्यांच्या प्रश्नांबरोबरच राज्यातील राजकीय घडामोडींवरही मुकुल वासनिक यांनी भाष्य केले. “दुसऱ्यांचे आमदार-खासदार फोडणाऱ्या भाजपला आता स्वतःचे आमदार-खासदार साबूत ठेवण्यासाठी प्रयत्न करावे लागतील,” असा टोला त्यांनी लगावला.

भाजपमध्येच सध्या कुजबुज सुरू असल्याचे सांगत आगामी काळात त्या पक्षात काय घडते, हे पाहावे लागेल, असेही वासनिक यांनी पत्रकारांशी बोलताना म्हटले. त्यांच्या या वक्तव्यामुळे शेतकऱ्यांच्या प्रश्नांवरील पाहणी दौऱ्याला राजकीय चर्चेचीही किनार मिळाली.

काँग्रेसचे पदाधिकारी उपस्थित

या पाहणी दौऱ्यावेळी महाराष्ट्र प्रदेश काँग्रेसचे अध्यक्ष हर्षवर्धन सपकाळ, जिल्हाध्यक्ष प्रकाश पाटील, माजी जिल्हाध्यक्ष राहुल बोंद्रे, काँग्रेस नेते लक्ष्मणदादा घुंमरे, देवानंद पवार, अॅड. माधुरी पवार यांच्यासह काँग्रेसचे पदाधिकारी आणि कार्यकर्ते उपस्थित होते.