Mission Line-out :देऊळगाव राजा तालुक्यात ‘मिशन लाइनआउट’; घरकुलांना गती देण्यासाठी प्रशासन सरसावले

Mission Line-out : तालुक्यातील अद्याप सुरू न झालेली घरकुले येत्या दहा दिवसांत सुरू करून लाभार्थ्यांना दिलासा द्यावा, असे स्पष्ट निर्देश जिल्हा परिषदेचे मुख्य कार्यकारी अधिकारी गुलाबराव खरात यांनी ग्रामपंचायत सचिवांना दिले. त्यांच्या उपस्थितीत गुरुवार, ८ ऑक्टोबर रोजी पंचायत समिती देऊळगाव राजा येथे केंद्र व राज्य शासनाच्या घरकुल योजनांसह रोजगार हमी योजना आणि दुष्काळ व पाणीटंचाई परिस्थितीचा सविस्तर आढावा घेण्यात आला.

 घरकुलांसोबत जलसंवर्धनावर भर; दुष्काळाच्या पार्श्वभूमीवर मुख्य कार्यकारी अधिकाऱ्यांचा आढावा दौरा

गजानन तिडके

देऊळगाव राजा : तालुक्यातील अद्याप सुरू न झालेली घरकुले येत्या दहा दिवसांत सुरू करून लाभार्थ्यांना दिलासा द्यावा, असे स्पष्ट निर्देश जिल्हा परिषदेचे मुख्य कार्यकारी अधिकारी गुलाबराव खरात यांनी ग्रामपंचायत सचिवांना दिले. त्यांच्या उपस्थितीत गुरुवार, ८ ऑक्टोबर रोजी पंचायत समिती देऊळगाव राजा येथे केंद्र व राज्य शासनाच्या घरकुल योजनांसह रोजगार हमी योजना आणि दुष्काळ व पाणीटंचाई परिस्थितीचा सविस्तर आढावा घेण्यात आला.

या भेटीदरम्यान मुख्य कार्यकारी अधिकारी गुलाबराव खरात, अतिरिक्त मुख्य कार्यकारी अधिकारी मोहन, प्रकल्प संचालक कोल्हे, उपमुख्य कार्यकारी अधिकारी (सामान्य) पवार आणि मुख्य लेखा व वित्त अधिकारी राठोड यांची उपस्थिती होती.

कुंभारी येथे घरकुलांचे भूमिपूजन; लाभार्थ्यांच्या घरांचे काम सुरू

भेटीच्या सुरुवातीला ग्रामपंचायत अंभोरा अंतर्गत कुंभारी येथे घरकुल लाभार्थ्यांच्या घरांचे प्रत्यक्ष भूमिपूजन करण्यात आले. यावेळी घरकुलांसाठी लाइनआउट देऊन बांधकामाला सुरुवात करून देण्यात आली. त्यामुळे घरकुल मंजूर होऊनही बांधकाम सुरू न झालेल्या लाभार्थ्यांना प्रत्यक्ष काम सुरू करण्यासाठी चालना मिळाली.

तसेच बांधकाम पूर्ण झालेल्या घरकुल लाभार्थ्यांच्या घरांचा गृहप्रवेश करण्यात आला. यानिमित्ताने सेवा संकल्प अभियानांतर्गत ‘आशीर्वादाचा दिवा’ हा उपक्रम राबविण्यात आला. घरकुल लाभार्थ्यांना हक्काच्या घरात प्रवेश मिळाल्याने या उपक्रमाला विशेष महत्त्व प्राप्त झाले. यावेळी कुंभारी येथे गटविकास अधिकारी मुकेश माहोर, सरला जाधव ग्रामपंचायत अधिकारी,  मंगेश खरात- ग्रामीण गृहनिर्माण अभियंता, प्रशांत काकडे ग्रामीण गृहनिर्माण अभियंता, माजी सरपंच परमेश्वर खांडेभराड आदींची उपस्थिती होती,

केंद्र व राज्य पुरस्कृत घरकुल योजनांचा सविस्तर आढावा

यानंतर पंचायत समितीच्या सभागृहात आढावा बैठक घेण्यात आली. यामध्ये प्रधानमंत्री आवास योजना टप्पा एक व दोन अंतर्गत मंजुरीसाठी प्रलंबित प्रकरणे, पहिला व दुसरा हप्ता प्रलंबित असलेली घरकुले तसेच पूर्ण झालेल्या घरकुलांची स्थिती तपासण्यात आली. याशिवाय राज्य पुरस्कृत विविध घरकुल योजनांच्या मंजुरीपासून पहिल्या हप्त्याचे वितरण आणि घरकुलांच्या पूर्णत्वापर्यंतच्या कामांचा आढावा घेण्यात आला.

रोजगार हमी योजनेच्या माध्यमातून घरकुल लाभार्थ्यांना उपलब्ध करून देण्यात येणाऱ्या कामांच्या मस्टरचाही आढावा घेण्यात आला. घरकुलांची कामे वेळेत पूर्ण करणे, प्रलंबित प्रक्रिया मार्गी लावणे आणि पात्र लाभार्थ्यांना योजनांचा लाभ मिळवून देणे यावर बैठकीत भर देण्यात आला.

‘मिशन लाइनआउट’ अभियानाला सुरुवात

तालुक्यातील घरकुलांची कामे निर्धारित वेळेत सुरू व्हावीत, यासाठी मुख्य कार्यकारी अधिकारी गुलाबराव खरात यांनी ‘मिशन लाइनआउट’ अभियान सुरू केले. आजपर्यंत ज्या घरकुलांचे बांधकाम सुरू झालेले नाही, अशा घरकुलांना येत्या दहा दिवसांत लाइनआउट देऊन प्रत्यक्ष बांधकाम सुरू करण्याचे निर्देश त्यांनी दिले.

सर्व ग्रामपंचायत सचिवांनी आपल्या कार्यक्षेत्रातील प्रलंबित घरकुलांचा आढावा घेऊन संबंधित लाभार्थ्यांची घरे सुरू करून घ्यावीत. या कामात कोणतीही दिरंगाई करू नये, असे स्पष्ट आदेशही त्यांनी दिले. या अभियानामुळे घरकुल योजनांच्या अंमलबजावणीला गती मिळण्याची अपेक्षा व्यक्त होत आहे.

दुष्काळ आणि पाणीटंचाईच्या नियोजनाचाही आढावा

देऊळगाव राजा तालुक्यातील दुष्काळसदृश परिस्थिती आणि संभाव्य पाणीटंचाईचा आढावा घेऊन उपलब्ध पाणीस्रोत, पिण्याच्या पाण्याचे नियोजन आणि जलसंवर्धनाच्या उपाययोजनांबाबत चर्चा करण्यात आली. पंचायत समितीच्या माध्यमातून घरकुलांची कामे पूर्णत्वाकडे नेण्यात येत असल्याबद्दल उपस्थित वरिष्ठ अधिकाऱ्यांनी समाधान व्यक्त केले. तसेच दुष्काळ व पाणीटंचाईच्या पार्श्वभूमीवर करण्यात आलेल्या नियोजनाचीही त्यांनी दखल घेतली.

दुष्काळाच्या परिस्थितीत पिण्याचे पाणी जपून वापरावे, उपलब्ध जलस्रोतांचे संरक्षण करावे आणि पाणीटंचाईचा संभाव्य धोका कमी करण्यासाठी आवश्यक उपाययोजना कराव्यात, अशा सूचना मुख्य कार्यकारी अधिकारी खरात यांनी दिल्या. तसेच व्ही. बी. जी. रामजी योजनेच्या माध्यमातून शक्य तितकी अधिक जलसंवर्धनाची कामे हाती घेऊन पाण्याची उपलब्धता वाढविण्यावर भर देण्याचे निर्देशही त्यांनी दिले.

घरकुल योजनांची प्रभावी अंमलबजावणी, प्रलंबित घरकुलांना गती, रोजगार हमीच्या कामांचे नियोजन आणि दुष्काळाच्या पार्श्वभूमीवर जलसंवर्धनाला प्राधान्य या मुद्द्यांवर या दौऱ्यात भर देण्यात आला. ‘मिशन लाइनआउट’च्या माध्यमातून पुढील दहा दिवसांत किती घरकुलांची कामे प्रत्यक्ष सुरू होतात, याकडे आता तालुक्यातील लाभार्थ्यांचे लक्ष लागले आहे.