Auto-rickshaw: पातूर-बाळापूर महामार्गावर ऑटो उलटला; जखमी प्रवाशाचा मृत्यू, उपचाराअभावी जीव गेल्याचा आरोप

Auto-rickshaw: पातूर पोलिस ठाण्याच्या हद्दीत येणाऱ्या पातूर-बाळापूर महामार्गावरील बाळापूर नाका येथे ऑटो उलटून झालेल्या भीषण अपघातात एका प्रवाशाचा मृत्यू झाला, तर अन्य दोन प्रवासी जखमी झाले. गंभीर जखमी असलेल्या प्रशांत चव्हाण, रा. जांभरुण, यांचा उपचारादरम्यान मृत्यू झाला. दरम्यान, अपघातानंतर वेळेत आणि योग्य वैद्यकीय उपचार मिळाले असते तर त्यांचा जीव वाचला असता, असा गंभीर आरोप नातेवाईक आणि नागरिकांकडून करण्यात येत आहे.

  बाळापूर नाक्यावरील अपघातानंतर आरोग्य यंत्रणेवर सवाल; ‘१०८’मध्ये डॉक्टर नसल्याचा आरोप

राहुल सोनोने

दिग्रस बू : पातूर पोलिस ठाण्याच्या हद्दीत येणाऱ्या पातूर-बाळापूर महामार्गावरील बाळापूर नाका येथे ऑटो उलटून झालेल्या भीषण अपघातात एका प्रवाशाचा मृत्यू झाला, तर अन्य दोन प्रवासी जखमी झाले. गंभीर जखमी असलेल्या प्रशांत चव्हाण, रा. जांभरुण, यांचा उपचारादरम्यान मृत्यू झाला. दरम्यान, अपघातानंतर वेळेत आणि योग्य वैद्यकीय उपचार मिळाले असते तर त्यांचा जीव वाचला असता, असा गंभीर आरोप नातेवाईक आणि नागरिकांकडून करण्यात येत आहे.

मिळालेल्या माहितीनुसार, एमएच ३० जी ९७८ क्रमांकाचा ऑटो बाळापूर नाका परिसरात अचानक उलटला. या दुर्घटनेत ऑटोमधून प्रवास करणारे प्रशांत चव्हाण गंभीर जखमी झाले. त्यांच्यासह अन्य दोन प्रवाशांनाही दुखापत झाली.

१०८ रुग्णवाहिकेत डॉक्टर नसल्याचा आरोप

अपघाताची माहिती मिळताच घटनास्थळी उपस्थित युवकांनी तातडीने १०८ रुग्णवाहिकेला फोन केला. मात्र, रुग्णवाहिकेत डॉक्टर उपलब्ध नसल्यामुळे जखमीला वेळेत वैद्यकीय उपचार मिळण्यास विलंब झाल्याचा आरोप नातेवाईकांकडून करण्यात आला आहे.

त्यानंतर गंभीर जखमी प्रशांत चव्हाण यांना प्राथमिक आरोग्य केंद्रात नेण्यात आले. मात्र, तेथेही वैद्यकीय अधिकारी उपस्थित नसल्याचा आरोप नातेवाईकांनी केला. उपचार मिळण्यास झालेल्या कथित विलंबानंतर प्रशांत चव्हाण यांचा मृत्यू झाला.

या घटनेनंतर नातेवाईक आणि नागरिकांमध्ये तीव्र संताप व्यक्त करण्यात आला. रस्त्यावर अपघात होणे ही दुर्दैवी घटना असली, तरी अपघातग्रस्ताला वेळेवर वैद्यकीय उपचार न मिळणे ही अधिक गंभीर बाब आहे, अशी प्रतिक्रिया नागरिकांकडून व्यक्त करण्यात आली.

सागर रामेकरांकडून चौकशीची मागणी

याप्रकरणी युवासेना जिल्हाप्रमुख सागर रामेकर यांनी १०८ रुग्णवाहिकेवरील संबंधित कर्मचाऱ्यांची चौकशी करून दोष आढळल्यास कठोर कारवाई करण्याची मागणी केली आहे. तसेच अपघातास जबाबदार असलेल्या व्यक्तींवरही कायदेशीर कारवाई करण्यात यावी, अशी मागणी त्यांनी केली.

अपघातातील जखमींना मदत करण्यासाठी सामाजिक कार्यकर्ते म्हणून सागर रामेकर घटनास्थळी तसेच प्राथमिक आरोग्य केंद्रात उपस्थित होते.

प्राथमिक आरोग्य केंद्रात काही काळ तणाव

दरम्यान, संपूर्ण घटनेनंतर मृत प्रशांत चव्हाण यांचे नातेवाईक आणि संबंधित ग्रामस्थ प्राथमिक आरोग्य केंद्र, पातूर येथे दाखल झाले. यावेळी मृताच्या नातेवाईकांसह जखमींना मदत करणारे सागर रामेकर यांच्याशी अरेरावी झाल्याचा आरोप करण्यात आला. त्यामुळे काही काळ प्राथमिक आरोग्य केंद्राच्या परिसरात तणावाचे वातावरण निर्माण झाले. परिस्थितीचे गांभीर्य लक्षात घेता ठाणेदार जाधव यांनी मृताच्या कुटुंबीयांची समजूत काढून परिस्थिती शांत केली.

‘दोषींवर कारवाई होईपर्यंत मृतदेह ताब्यात घेणार नाही’ची भूमिका

दरम्यान, संबंधित दोषींवर कठोर कारवाई होईपर्यंत मृतदेह शवविच्छेदनासाठी पाठवू देणार नाही, अशी भूमिका मृताच्या नातेवाईकांनी घेतल्याचे समोर आले. त्यामुळे काही काळ घटनास्थळी तणावाचे वातावरण निर्माण झाले होते. या पार्श्वभूमीवर प्रशासनाने या घटनेची गांभीर्याने दखल घेण्याची मागणी होत आहे. १०८ रुग्णवाहिकेतील वैद्यकीय सुविधांची उपलब्धता, प्राथमिक आरोग्य केंद्रातील वैद्यकीय अधिकाऱ्यांची उपस्थिती आणि जखमीला उपचार मिळण्यास झालेला कथित विलंब, या सर्व बाबींची स्वतंत्र चौकशी करण्याची मागणी नागरिकांकडून होत आहे.

दरम्यान, प्रशांत चव्हाण यांचा मृत्यू नेमका अपघातातील गंभीर दुखापतीमुळे झाला की उपचार मिळण्यास झालेल्या कथित विलंबामुळे त्यांची प्रकृती अधिक गंभीर झाली, याबाबत अधिकृत तपास आणि वैद्यकीय अहवालातूनच स्पष्टता येणार आहे. त्यामुळे या संपूर्ण प्रकरणाची निष्पक्ष चौकशी होणे महत्त्वाचे ठरणार आहे.