Drought officially : बुलढाणा जिल्ह्यात दुष्काळावर शिक्कामोर्तब! १,४२० गावांची पैसेवारी ५० पैशांपेक्षा कमी

Drought officially : सन २०२६-२७ च्या खरीप हंगामासाठी जिल्ह्यातील १ हजार ४२० गावांची नजर अंदाज पिकेवारी जाहीर करण्यात आली असून, जिल्ह्यातील एकाही गावाची पैसेवारी ५० पैशांपर्यंत पोहोचलेली नाही. सर्व १,४२० गावांमध्ये ५० पैशांपेक्षा कमी पैसेवारी नोंदविण्यात आली आहे. त्यामुळे खरीप हंगामातील पीक परिस्थिती गंभीर असून, जिल्ह्यावर दुष्काळाचे संकट असल्याचे चित्र स्पष्ट झाले आहे.

 खरीप हंगामाची धक्कादायक स्थिती; जिल्ह्याची सरासरी पैसेवारी अवघी ४३ पैसे

बुलढाणा : सन २०२६-२७ च्या खरीप हंगामासाठी जिल्ह्यातील १ हजार ४२० गावांची नजर अंदाज पिकेवारी जाहीर करण्यात आली असून, जिल्ह्यातील एकाही गावाची पैसेवारी ५० पैशांपर्यंत पोहोचलेली नाही. सर्व १,४२० गावांमध्ये ५० पैशांपेक्षा कमी पैसेवारी नोंदविण्यात आली आहे. त्यामुळे खरीप हंगामातील पीक परिस्थिती गंभीर असून, जिल्ह्यावर दुष्काळाचे संकट असल्याचे चित्र स्पष्ट झाले आहे.

जिल्हा प्रशासनाने जाहीर केलेल्या आकडेवारीनुसार, बुलढाणा जिल्ह्याची सरासरी पैसेवारी ४३ पैसे इतकी आहे. तालुकानिहाय विचार करता बुलढाणा तालुक्यातील ९८, चिखली १४४, देऊळगाव राजा ६४, मेहकर १६१, लोणार ९१, सिंदखेड राजा ११४, मलकापूर ७३, मोताळा १२०, नांदुरा ११२, खामगाव १४६, शेगाव ७३, जळगाव जामोद ११९ आणि संग्रामपूर तालुक्यातील १०५ गावांचा यामध्ये समावेश आहे.

जळगाव जामोदची पैसेवारी सर्वाधिक; बुलढाणा तालुका सर्वात कमी

तालुकानिहाय सरासरी पैसेवारीत जळगाव जामोद तालुका ४८ पैशांसह जिल्ह्यात सर्वाधिक आहे. त्यापाठोपाठ मेहकर ४५, लोणार ४६, मलकापूर ४६, मोताळा ४६, शेगाव ४६ आणि संग्रामपूर ४६ पैसेवारी नोंदविण्यात आली आहे.

चिखली तालुक्याची सरासरी पैसेवारी ३८, देऊळगाव राजा व सिंदखेड राजा प्रत्येकी ४३, नांदुरा ४३ आणि खामगाव ४२ पैसेवारी आहे. बुलढाणा तालुक्याची सरासरी पैसेवारी केवळ ३१ पैसे असून ती जिल्ह्यात सर्वात कमी आहे.

५० पैशांच्या आतच आणेवारी

नजर अंदाज पिकेवारीच्या या आकडेवारीतील सर्वात महत्त्वाची बाब म्हणजे जिल्ह्यातील सर्व १,४२० गावांची पैसेवारी ५० पैशांपेक्षा कमी आहे. त्यामुळे खरीप हंगामातील पीक परिस्थिती अत्यंत चिंताजनक असल्याचे स्पष्ट होत असून, जिल्ह्यात दुष्काळी परिस्थितीवर शिक्कामोर्तब झाल्याचे चित्र आहे.

जिल्हा प्रशासनाकडून जाहीर करण्यात आलेली ही नजर अंदाज पिकेवारी खरीप हंगामातील पीक परिस्थितीचा प्राथमिक अंदाज मानला जातो. त्यामुळे पुढील टप्प्यातील पिकांची स्थिती, उत्पादनातील घट आणि दुष्काळाच्या निकषांनुसार आवश्यक उपाययोजनांकडे आता शेतकऱ्यांचे लक्ष लागले आहे. सलग सर्व गावांची पैसेवारी ५० पैशांखाली आल्याने शेतकरी, कृषी क्षेत्र आणि ग्रामीण अर्थव्यवस्थेसमोरील संकटाची तीव्रता अधोरेखित झाली आहे.