Amravati Teachers Constituency: अमरावती शिक्षक मतदारसंघाची रणधुमाळी सुरू; पहिल्याच दिवशी ४४ नामनिर्देशनपत्रांची उचल

Amravati Teachers Constituency:  महाराष्ट्र विधान परिषदेच्या अमरावती विभाग शिक्षक मतदारसंघाच्या निवडणुकीची अधिकृत प्रक्रिया सुरू झाली असून, निवडणुकीची सूचना मंगळवारी प्रसिद्ध करण्यात आली. निवडणूक कार्यक्रम जाहीर होताच शिक्षक मतदारसंघातील राजकीय हालचालींना वेग आला आहे. पहिल्याच दिवशी दुपारी ३ वाजेपर्यंत एकही नामनिर्देशनपत्र दाखल झाले नसले, तरी २० इच्छुक उमेदवारांसाठी तब्बल ४४ नामनिर्देशनपत्रांची उचल झाल्याची माहिती निवडणूक प्रशासनाकडून देण्यात आली.

   शिक्षक मतदारसंघ निवडणुकीचे बिगुल; २० इच्छुकांच्या ४४ अर्जांची उचल, अद्याप एकही अर्ज दाखल नाही

अमरावती : महाराष्ट्र विधान परिषदेच्या अमरावती विभाग शिक्षक मतदारसंघाच्या निवडणुकीची अधिकृत प्रक्रिया सुरू झाली असून, निवडणुकीची सूचना मंगळवारी प्रसिद्ध करण्यात आली. निवडणूक कार्यक्रम जाहीर होताच शिक्षक मतदारसंघातील राजकीय हालचालींना वेग आला आहे. पहिल्याच दिवशी दुपारी ३ वाजेपर्यंत एकही नामनिर्देशनपत्र दाखल झाले नसले, तरी २० इच्छुक उमेदवारांसाठी तब्बल ४४ नामनिर्देशनपत्रांची उचल झाल्याची माहिती निवडणूक प्रशासनाकडून देण्यात आली.

अमरावती विभाग शिक्षक मतदारसंघातून महाराष्ट्र विधान परिषदेच्या एका सदस्याची निवड करण्यात येणार आहे. भारत निवडणूक आयोगाने निवडणुकीची घोषणा केल्यानंतर विभागीय आयुक्त तथा निवडणूक निर्णय अधिकारी, अमरावती विभाग शिक्षक मतदारसंघ यांनी निवडणुकीची सूचना प्रसिद्ध केली आहे.

६ ऑक्टोबरपर्यंत उमेदवारी अर्ज दाखल करता येणार

निवडणुकीसाठी उमेदवाराला किंवा त्याच्या कोणत्याही प्रस्तावकाला नामनिर्देशनपत्र दाखल करता येणार आहे. निवडणूक निर्णय अधिकारी तथा विभागीय आयुक्त, अमरावती विभाग, अमरावती किंवा सहायक निवडणूक निर्णय अधिकारी तथा सहआयुक्त (सामान्य प्रशासन), विभागीय आयुक्त कार्यालय, अमरावती यांच्याकडे मंगळवार, दि. ६ ऑक्टोबर २०२६ पर्यंत, सार्वजनिक सुट्टी वगळता, सकाळी ११ ते दुपारी ३ या वेळेत नामनिर्देशनपत्रे दाखल करता येतील.

ही प्रक्रिया विभागीय आयुक्त कार्यालयातील सभागृह क्रमांक २, तळमजला, कॅम्प, अमरावती येथे पार पडणार आहे. नामनिर्देशनपत्रेही याच ठिकाणी उपलब्ध करून देण्यात आली आहेत.

७ ऑक्टोबरला छाननी

दाखल झालेल्या नामनिर्देशनपत्रांची छाननी बुधवार, दि. ७ ऑक्टोबर २०२६ रोजी सकाळी ११ वाजता सुरू होईल. निवडणूक निर्णय अधिकारी तथा विभागीय आयुक्त यांच्या कार्यालयातील सभाकक्ष क्रमांक २, तळमजला येथे ही प्रक्रिया पार पडणार आहे.

उमेदवारी मागे घेण्याची अंतिम मुदत शुक्रवार, दि. ९ ऑक्टोबर २०२६ रोजी दुपारी ३ वाजेपर्यंत आहे. उमेदवार किंवा त्याने लेखी प्राधिकार दिलेला प्रस्तावक अथवा निवडणूक प्रतिनिधी संबंधित अधिकाऱ्याकडे उमेदवारी मागे घेण्याबाबतची सूचना देऊ शकतो.

२३ ऑक्टोबरला मतदान

निवडणूक लढविली गेल्यास शुक्रवार, दि. २३ ऑक्टोबर २०२६ रोजी सकाळी ८ ते दुपारी ४ या वेळेत मतदान घेण्यात येणार आहे. त्यामुळे नामनिर्देशन प्रक्रिया, छाननी आणि उमेदवारी माघारीनंतर निवडणुकीतील प्रत्यक्ष राजकीय चित्र अधिक स्पष्ट होणार आहे.

विभागातील प्रशासन यंत्रणा सज्ज

निवडणुकीची सूचना निवडणूक निर्णय अधिकारी, विभागातील सर्व जिल्हाधिकारी तथा सहाय्यक निवडणूक निर्णय अधिकारी आणि उपजिल्हा निवडणूक अधिकारी यांच्या कार्यालयातील सूचना फलकांवर प्रसिद्ध करण्यात आली आहे. तसेच विभागातील जिल्हा परिषदांचे मुख्य कार्यकारी अधिकारी, उपविभागीय अधिकारी, तहसीलदार, महापालिका आयुक्त, नगरपालिका, पंचायत समिती आणि ग्रामपंचायत कार्यालयांमध्येही ती प्रसिद्ध करण्याचे आदेश देण्यात आले आहेत.

दरम्यान, अमरावती विभाग शिक्षक मतदारसंघाची अंतिम मतदार यादी मुख्य निवडणूक अधिकारी, महाराष्ट्र यांच्या संकेतस्थळावर उपलब्ध आहे.

निवडणूक निर्णय अधिकारी तथा विभागीय आयुक्त नयना गुंडे यांनी निवडणूक कार्यक्रमाबाबत ही माहिती दिली आहे. पहिल्याच दिवशी २० इच्छुकांकडून ४४ नामनिर्देशनपत्रांची उचल झाल्याने आगामी काही दिवसांत उमेदवारीसाठीची राजकीय चुरस आणि हालचाली वाढण्याची शक्यता आहे.