Eco-friendly : हिंगण्यात कुंडीत केले पर्यावरणपूरक गणेश विसर्जन; मूर्ती विरघळताच त्याच कुंडीत वृक्षारोपण

Eco-friendly : पातूर तालुक्यातील हिंगणा येथे नदीचे जलप्रदूषण टाळण्यासाठी यंदाही सामूहिक पर्यावरणपूरक गणेश विसर्जनाचा उपक्रम राबविण्यात आला. नदी अथवा जलस्रोतांमध्ये गणेशमूर्तीचे विसर्जन न करता कुंडीत विसर्जन करण्यात आले. विशेष म्हणजे, गणेशमूर्ती विरघळल्यानंतर त्याच कुंडीत वृक्षारोपण करून त्याचे संगोपन करण्याचा संकल्प यावेळी करण्यात आला.

 गणपती बाप्पांच्या विसर्जनातून पर्यावरण संवर्धनाचा संदेश; हिंगण्यात कुंडीत विसर्जन अन् वृक्षारोपण

राहुल सोनोने

वाडेगाव : पातूर तालुक्यातील हिंगणा येथे नदीचे जलप्रदूषण टाळण्यासाठी यंदाही सामूहिक पर्यावरणपूरक गणेश विसर्जनाचा उपक्रम राबविण्यात आला. नदी अथवा जलस्रोतांमध्ये गणेशमूर्तीचे विसर्जन न करता कुंडीत विसर्जन करण्यात आले. विशेष म्हणजे, गणेशमूर्ती विरघळल्यानंतर त्याच कुंडीत वृक्षारोपण करून त्याचे संगोपन करण्याचा संकल्प यावेळी करण्यात आला.

हिंगणा गावासह पंचक्रोशीमध्ये ‘वाढदिवस वृक्ष’ या संकल्पनेचे प्रणेते शेषनाग उजाडे हे मित्रांच्या सहकार्याने सन २०२२ पासून ‘ना नफा, ना तोटा’ या तत्त्वावर मातीच्या श्री गणेशमूर्तींचे वितरण करीत आहेत. पर्यावरणपूरक गणेशोत्सवाला चालना मिळावी आणि नदी व जलस्रोतांचे प्रदूषण टाळले जावे, या उद्देशाने हा उपक्रम राबविला जात आहे.

मागील वर्षापासून हिंगणा येथे सामूहिक पर्यावरणपूरक गणपती विसर्जन कार्यक्रमाला सुरुवात करण्यात आली आहे. गावकऱ्यांनी नदीमध्ये गणेशमूर्तीचे विसर्जन करण्याऐवजी कुंडीत विसर्जन करून त्यानंतर त्याच कुंडीत रोपटे लावण्याचा उपक्रम राबविला. लावलेल्या रोपट्यांचे सामूहिक संगोपनही करण्यात आले.

गणेशमूर्तीपासून वृक्ष संवर्धनाचा संकल्प

यंदाही हिंगणा येथे याच संकल्पनेनुसार सामूहिक पर्यावरणपूरक गणपती विसर्जन कार्यक्रम आयोजित करण्यात आला. गणेशमूर्ती विसर्जनासाठी आवश्यक कुंड्यांची व्यवस्था करण्यात आली होती. मूर्ती विरघळल्यानंतर त्याच कुंडीत विविध प्रकारच्या वृक्षांची लागवड करण्यात येणार असून, ही रोपे मोठी होईपर्यंत त्यांचे संगोपन करण्याचा संकल्प करण्यात आला आहे.

गणेशोत्सवाच्या माध्यमातून धार्मिक श्रद्धेसोबतच पर्यावरण संवर्धनाचा संदेश देणाऱ्या या उपक्रमाचे ग्रामस्थांकडून स्वागत करण्यात आले. जलप्रदूषण टाळण्याबरोबरच वृक्षारोपण आणि वृक्षसंवर्धनाला चालना देण्याचा हा उपक्रम इतरांसाठीही प्रेरणादायी ठरत आहे.

या वेळी शेषनाग उजाडे, गोपाल सोनोने, तुकाराम उजाडे, सोपान गोपाळ उजाडे, अंकित उजाडे, विश्वास उजाडे, गणेश इंगळे, विशाल उजाडे यांच्यासह गावातील प्रतिष्ठित ग्रामस्थ आणि महिला मोठ्या संख्येने उपस्थित होत्या.