Akola LCB raids :७ दिवसांचा पाठलाग, १२०० किमी प्रवास; अकोला LCB ची मध्य प्रदेशात धडक, ११.९० लाखांची रोकड जप्त

Akola LCB raids : अकोला शहर आणि अकोट येथील चोरीच्या दोन वेगवेगळ्या गुन्ह्यांचा छडा लावण्यासाठी स्थानिक गुन्हे शाखेच्या पथकाने मध्य प्रदेशात आंतरराज्यीय धडक कारवाई केली. सलग सात दिवस अहोरात्र पाठलाग आणि तब्बल १२०० किलोमीटरचा प्रवास करून पोलिसांनी राजगड जिल्ह्यातील कडिया गावात संशयित आरोपींच्या घरांवर छापे टाकले. या कारवाईदरम्यान दोन्ही चोरीच्या गुन्ह्यांतील एकूण ११ लाख ९० हजार रुपयांची रोख रक्कम हस्तगत करण्यात आल्याची माहिती पोलिसांनी दिली आहे.

कडिया टोळीवर अकोला पोलिसांचा शिकंजा; दोन चोरीच्या गुन्ह्यांतील लाखोंची रोकड हस्तगत

अकोला : अकोला शहर आणि अकोट येथील चोरीच्या दोन वेगवेगळ्या गुन्ह्यांचा छडा लावण्यासाठी स्थानिक गुन्हे शाखेच्या पथकाने मध्य प्रदेशात आंतरराज्यीय धडक कारवाई केली. सलग सात दिवस अहोरात्र पाठलाग आणि तब्बल १२०० किलोमीटरचा प्रवास करून पोलिसांनी राजगड जिल्ह्यातील कडिया गावात संशयित आरोपींच्या घरांवर छापे टाकले. या कारवाईदरम्यान दोन्ही चोरीच्या गुन्ह्यांतील एकूण ११ लाख ९० हजार रुपयांची रोख रक्कम हस्तगत करण्यात आल्याची माहिती पोलिसांनी दिली आहे.

अकोल्यातील ज्वेलर्स संचालकाच्या मोपेडमधून साडेनऊ लाखांची चोरी

अकोला शहरातील सिव्हिल लाईन पोलीस ठाण्याच्या हद्दीत प्रणव ज्वेलर्सचे संचालक परेश चंदुलाल सराफ हे दुकान बंद करून घरी पोहोचले होते. यावेळी त्यांच्या टीव्हीएस ज्युपिटर मोपेडच्या डिक्कीतून अज्ञात चोरट्यांनी ९ लाख ५० हजार रुपये रोख आणि चाव्यांची पिशवी चोरून नेली होती.
या प्रकरणी सिव्हिल लाईन पोलीस ठाण्यात गुन्हा क्रमांक ६१८/२०२६ अन्वये भारतीय न्याय संहितेच्या कलम ३०३ (२), ३०५, ३३४ (१) व ३ (५) अंतर्गत गुन्हा दाखल करण्यात आला होता.

अकोटमध्ये बँकेबाहेरून रोख रकमेची पिशवी लंपास

दुसरी घटना अकोट शहर पोलीस ठाण्याच्या हद्दीत घडली. भारतीय स्टेट बँक, मुख्य शाखा अकोट येथून फिर्यादी योगेश पुरुषोत्तम चांडक यांची २ लाख ८८ हजार रुपये रोख असलेली कापडी पिशवी अज्ञात चोरट्याने पळवून नेली होती.
याप्रकरणी अकोट शहर पोलीस ठाण्यात गुन्हा क्रमांक ४८३/२०२६ अन्वये भारतीय न्याय संहितेच्या कलम ३०३ (२) अंतर्गत गुन्हा नोंदविण्यात आला होता.

सीसीटीव्ही, सायबर तपासातून मध्य प्रदेशातील टोळीचा माग

दोन्ही गुन्ह्यांचा समांतर तपास करण्याचे आदेश पोलीस अधीक्षक अर्चित चांडक यांनी स्थानिक गुन्हे शाखेला दिले होते. त्यानुसार स्थानिक गुन्हे शाखेचे पोलीस निरीक्षक नितीन लेव्हकर यांनी पथक गठीत केले.
तपास पथकाने घटनास्थळांवरील सीसीटीव्ही फुटेजचे तांत्रिक विश्लेषण केले. तसेच सायबर सेलची मदत आणि गोपनीय बातमीदारांकडून मिळालेल्या माहितीच्या आधारे चोरीच्या घटनांमागे मध्य प्रदेशातील राजगड जिल्ह्यातील सांसी/सिसोदिया टोळीचा सहभाग असल्याचे निष्पन्न झाल्याचे पोलिसांनी सांगितले.

सात दिवसांचा पाठलाग; कडिया गावात छापेमारी

संशयित आरोपींच्या शोधासाठी स्थानिक गुन्हे शाखेच्या पथकाने सलग सात दिवस अहोरात्र पाठलाग केला. तब्बल १२०० किलोमीटरचा खडतर प्रवास करून पथक मध्य प्रदेशात पोहोचले. राजगड पोलीस नियंत्रण कक्ष आणि बोडा पोलीस ठाण्याच्या हद्दीतील कडिया गावात स्थानिक पोलिसांच्या मदतीने संशयित आरोपींच्या घरांवर अचानक छापे टाकण्यात आले.
पोलिसांच्या छाप्याची चाहूल लागताच संशयित आरोपी पसार झाल्याचे सांगण्यात आले. मात्र, घरांची कसून झडती आणि सखोल चौकशीदरम्यान चोरीच्या गुन्ह्यांशी संबंधित रोख रक्कम हस्तगत करण्यात पोलिसांना यश आले.
दोन घरांतून रोकड हस्तगत
पोलिसांच्या माहितीनुसार, कारवाईदरम्यान पुढीलप्रमाणे रोकड जप्त करण्यात आली :
• जॉकी सिसोदिया याच्या घरातून : सिव्हिल लाईन, अकोला येथील चोरीच्या प्रकरणातील ९ लाख ५० हजार रुपयांची संपूर्ण रोख रक्कम.
• गौरव गोविंद सांसी याच्या घरातून : अकोट शहरातील स्टेट बँक चोरीच्या प्रकरणातील २ लाख ४० हजार रुपये.
अशाप्रकारे दोन्ही गुन्ह्यांतील एकूण ११ लाख ९० हजार रुपयांची रोख रक्कम कायदेशीररीत्या जप्त करण्यात आल्याचे पोलिसांनी नमूद केले आहे. फरार संशयित आरोपींचा शोध आणि पुढील तपास सुरू आहे.

वरिष्ठ अधिकाऱ्यांच्या मार्गदर्शनाखाली कारवाई

ही कारवाई पोलीस अधीक्षक अर्चित चांडक आणि अपर पोलीस अधीक्षक बी. चंद्रकांत रेड्डी यांच्या मार्गदर्शनाखाली करण्यात आली. स्थानिक गुन्हे शाखेचे पोलीस निरीक्षक नितीन लेव्हकर, सहायक पोलीस निरीक्षक निलेश देशमुख, सहायक पोलीस निरीक्षक गोपाल जाधव, पोलीस उपनिरीक्षक विष्णू बोडखे, पोलीस उपनिरीक्षक माजीद पठाण, पोलीस उपनिरीक्षक अनिल चव्हाण यांच्यासह पोलीस अंमलदारांनी कारवाईत सहभाग घेतला.
या पथकात शेख हसन, फिरोज खान, उमेश पराये, अब्दुल माजिद, एजाज अहमद, खुशाल नेमाडे, भारकर धोत्रे, राहुल गायकवाड, श्रीकांत पातोंड, मोहम्मद आमीर, अभिषेक पाठक, धिरज वानखडे, आकाश मानकर, राज चंदेल, अमोल दिपके आणि चालक प्रकाश लोखंडे यांचा समावेश होता.