Ganeshotsav :गणेशोत्सवात सामाजिक बांधिलकीचा जागर;  रक्तदान शिबिराला युवकांचा उत्स्फूर्त प्रतिसाद

Ganeshotsav : सामाजिक कार्यात नेहमीच अग्रेसर राहणाऱ्या श्री शिवाजी व्यायाम शाळा गणेश मंडळाच्या वतीने २१ सप्टेंबर रोजी साखरखेर्डा येथे भव्य रक्तदान शिबिराचे आयोजन करण्यात आले. गणेशोत्सवाच्या निमित्ताने आयोजित या सामाजिक उपक्रमाला युवकांनी उत्स्फूर्त प्रतिसाद देत मोठ्या संख्येने सहभाग नोंदविला. रक्तदानाच्या माध्यमातून गरजू रुग्णांना मदत करण्याचा संदेश देत मंडळाने सामाजिक बांधिलकी जपली.

 रक्तदानातून गरजू रुग्णांना जीवनदानाची आशा; साखरखेर्ड्यात श्री शिवाजी व्यायाम शाळेचा स्तुत्य उपक्रम

साखरखेर्डा : सामाजिक कार्यात नेहमीच अग्रेसर राहणाऱ्या श्री शिवाजी व्यायाम शाळा गणेश मंडळाच्या वतीने २१ सप्टेंबर रोजी साखरखेर्डा येथे भव्य रक्तदान शिबिराचे आयोजन करण्यात आले. गणेशोत्सवाच्या निमित्ताने आयोजित या सामाजिक उपक्रमाला युवकांनी उत्स्फूर्त प्रतिसाद देत मोठ्या संख्येने सहभाग नोंदविला. रक्तदानाच्या माध्यमातून गरजू रुग्णांना मदत करण्याचा संदेश देत मंडळाने सामाजिक बांधिलकी जपली.

बुलढाणा येथील जिल्हा शल्यचिकित्सक कार्यालयाच्या रक्तपेढीची टीम रक्तदान शिबिरासाठी साखरखेर्डा येथे दाखल झाली होती. या पथकात रक्त संक्रमण अधिकारी डॉ. अश्विन डांगर, तांत्रिक पर्यवेक्षक विनोद झगरे, रक्तपेढी तंत्रज्ञ पूजा बनकर, अधिपरिचारक दिनेश गोडाले, कक्षसेवक भीमराव दाभाडे आणि आकाश यंगड यांचा समावेश होता. पथकाने रक्त संकलनाची प्रक्रिया पार पाडली.

श्री शिवाजी व्यायाम शाळा गणेश उत्सव मंडळाचे अध्यक्ष अशोक इंगळे यांच्या नेतृत्वाखाली व्यायाम शाळेतील युवकांनी शिबिरात सहभाग घेत रक्तदान केले. शिबिराचे उद्घाटन ठाणेदार युवराज रबडे यांच्या हस्ते करण्यात आले. यावेळी युवा सेना नेते योगेश जाधव यांच्या हस्ते रक्तदात्यांना प्रमाणपत्रांचे वाटप करण्यात आले.

रक्तदानातून गरजू रुग्णांना मदत

सेवानिवृत्त केंद्रप्रमुख दिलीप खंडारे यांनी रक्तदानाचे महत्त्व स्पष्ट करताना सांगितले की, रक्तदान केल्यामुळे अनेक गरजू रुग्णांना उपचारासाठी रक्ताची सुविधा उपलब्ध होऊ शकते. रुग्णांचे प्राण वाचविण्यासाठी रक्तदात्यांचे योगदान महत्त्वपूर्ण ठरते. रक्तदान हे सामाजिक दायित्वाचा एक भाग असून, प्रत्येकाने या उपक्रमात सहभागी व्हावे, असे आवाहन त्यांनी केले.

गणेशोत्सव काळात रक्तदानासारखे सामाजिक उपक्रम राबविणे ही एकप्रकारे देशसेवा आहे. समाजासाठी अशा उपक्रमांची आज नितांत गरज असून, युवकांनी सामाजिक कार्यात पुढाकार घ्यावा, असे विचार योगेश जाधव यांनी व्यक्त केले.

मान्यवरांच्या भेटीने युवकांचा उत्साह वाढला

रक्तदान शिबिराला सरपंच अमित जाधव यांच्यासह अनेक मान्यवरांनी भेट देऊन युवकांचा उत्साह वाढविला. या उपक्रमात सोमेश्वर इंगळे, सुजित राठोड, रितेश देशमुख, विनायक जाधव, राहुल नालिंदे, बालाजी इंगळे, सूरज तळेकर, प्रतीक तायडे, आदित्य पाटील, महेश सर्डे, ओंकार इंगळे, वैभव टाले, आदित्य जगताप, गोपाल सोनुने, विशाल सोनुने, रोहन हाडे, प्रसन्न पाटील, अधिराज जैन, जय कोरडे यांच्यासह अनेक युवकांनी रक्तदान केले.

शिबिराच्या यशस्वी आयोजनासाठी सेवानिवृत्त औषधनिर्माता गोपाल मानतकर, शिवाजी शर्मा, राजू जैन, विकास इंगळे आणि गजानन इंगळे यांचे मोलाचे सहकार्य लाभले. युवकांच्या सहभागातून पार पडलेल्या या रक्तदान शिबिराचे परिसरातून कौतुक होत आहे.